Lalhruaichhuaka'n Health Minister a hmu

Steve Lalhruaichhuaka, Kolasib Electric Veng chuan nimin khan Health minister Lal Thanzara hnenah, February 3, 2015-a Kolasib District Hospital-a a nupui, Babie Zotharpari thih chungchangah a ṭul anga hma laksak thuai turin a ngen.

Steve Lalhruaichhuaka hian Health Minister hi a pisaah nimin khan a hmu a, a nupui thih chungchanga a sawi duhte chu ziakin a pe a ni. Lalhruai­chhuaka chuan, "Thil tisualtu chu hrem ngei tura i tihna avangin i ṭawngkam ṭha bawhzuiin i puihna kan rawn dil che a ni," a ti.

Lalhruaichhuaka chuan, a nupuiin a hun takah ngaihsak a hlawh loh thu leh a damdawi mamawh a hun taka pek a nih loh thu te, zan dar 6:55-ah nau neia thisen tam tak a hloh chung­in thisen pek a ngaih thu zan dar 8 hnuah an dawn thu leh zan dar 9:30 pelh hnuah thisen pek chauh a nih thute a tarlang a; an thil tawn dan dangte a tarlang bawk.

Steve Lalhruaichhuaka chuan, an chhiat tawhna ang chu miretheite chunga a thlen nawn tawh loh nan a rang thei ang bera hma la turin Health Minister chu a ngen a; thil dik lo a thlen nawn tawh loh nan leh an fimkhur lehzual theih nana hma la turin a ngen a ni.