Ṭhuampui kawngpui kama dan loa thil zuarte inkhâr tura hriattir an ni

Aizawl Municipal Corporation (AMC) chuan Ṭhuampui Veng leh Falkland Veng inkar kawngpui kama phalna nei loa thlai leh thei zuarte chu nimin khan an dawr khâr turin a hriattir. AMC hian phal lohna hmuna thlai leh thei zuarte dan anga an ṭhut theih dan tur a ngaihtuah dawn.

AMC hotute leh police-te chuan Ṭhuampui leh Falkland inkara phal lohna hmuna inzuarte awmna hmun chu nimin khan an kal chilh a, inkhâr turin an hriattir a ni.

Ṭhuampui Veng leh Falkland Veng inkara thlai leh thei zuarte chu Ṭhuampui Local Council remtihnaa ṭhu an nih avangin nimin khan Ṭhuampui LC hruaitute leh AMC hotute chu deputy mayor R Thanglura pisaah an ṭhukhawm a; AMC chu thutlukna a siam tawh angin a kaltlang dawn nia thu dawn.

Khawtlang hruaitute nen an inkawm zawha thuthar thehdarhtute'n an kawmnaah R Thanglura chuan, "AMC chu kan thutlukna lo siam tawh ang khan kal zel turin kan inbuatsaih a, vawiin (August 2) aṭang hian vendor ho pawh inkhâr turin kan hrilh nawn ang a, vawiin (August 2) tlai aṭangin an inkhâr ang. Dan loa Assam type in chhâwng an sakte pawh ṭhiat turin police-te nen kan hrilh nghal dawn," a ti.

Deputy Mayor chuan, vendor chungchanga kal zel dan tur chu Ṭhuampui LC, vendor neitute leh Mayor hoa la sawiho leh tur a nih thu sawiin, "Hnawhchhuah rum rum a, an awmna ṭhiah vek kha kan number one a la ni rih lo. Dan anga thlamuang taka an ṭhut theihna tur erawh chu Vending Regulation hnuaiah AMC-in ngaihtuah a tum," a ti a; Aizawl khawpuia vendor-te chuan AMC-ah an ṭhut man an chhûng lut tur a nih laiin, Khatlaa vendor-te chauhin ṭhut man an chhùn luh ṭhin thu a sawi.

AMC hotute hnen aṭanga thu dawn danin, Ṭhuampui leh Falkland Veng inkarah hian thlai leh thei zawrhna hmun pathum a awm. Ṭhuampui Bazar hnaih bera vendor chu AMC-in phalna a pek a ni a, hmun dang pahniha vendor 17 vel erawh chu phalna nei loa siam a nih avangin khâr tura tih an ni.

Thlai leh thei zuartute zawhna chhangin, an inzawrhna hmun pathumah chhungkaw 30 chuangin ei an zawng tih an sawi a, "Kan thlai leh thei zawrhte hi chhe awlsam tak tak a ni a, a bá zela kan lak avangin kan hralh zawh loh chuan leiba kan ngah dawn lutuk. Vendor siam nan hian loan-te kan la a, kan eizawnna hi min khârsak lo turin thuneitute kan ngen a ni," an ti a; an eizawnna hmun chu khâr a ngai dawn a nih chuan eizawnna tur hmun dang ngaihtuahsak turin AMC an ngen.

AMC chuan July 9, 2024 khan Ṭhuampui leh Falkland inkara vending zone ni loa thlai leh thei zuarte chu July 2024 chhunga insaseng turin a hriattir a; an insaseng loh avangin August 1, 2024 khan AMC Joint Commissioner chuan hriattirna tichhuakin, August 2, 2024 chawhma dar 11-ah police-te nen hmalak an tum thu hriattirna a tichhuak a, chumi hmaa insaseng turin thlai leh thei zuartute chu a chah a ni.

Thlai leh thei zuartute chu nimin thleng khan an la insaseng lo a, dâwr erawh an khâr. AMC-in insaseng tura a tih chung­changah hian Ṭhuampui LC-in hlauthâwng lo tura an tih avangin an insaseng lo tih an sawi a; Ṭhuampui LC hnenah thla tin seat khatah Rs 500 an pek ṭhin thu an sawi bawk.