Lehkha lem hmanga hna thawkin Gauhati High Court-ah bail a dil

Zirna lehkha pawi­mawh (document) lem hmanga dental surgeon hna thawktu Chris­tina Lalṭha­zuali, Dinthar, Aizawl chuan Gauhati High Court Aizawl Bench-ah interim bail a dil.

Police aṭanga thu dawn danin, Christina Lalṭhazuali chu a laka FIR an dawn hnuah Aizawl Police Station-ah koh a ni a, koh a nih ní-ah damdawi-inah dah luh (admit) a ni. Damdawi-in aṭanga a chhuah hnuah Gauhati High Court-ah bail a dil a, a dilna chu August 6, 2024-ah ngaihtuah a ni ang.

Christina Lalṭhazuali hian Aizawl District Court-ah bail a lo dil tawh a, District Court chuan a lo hnâwl a ni.

Health & Family Welfare department chuan Christina Lalṭhazuali lakah July 24, 2024 khan Aizawl SP hnenah FIR an thehlut a, Aizawl SP-in FIR a ziah luh theih loh avangin Aizawl PS-ah a thawn a, Aizawl PS-ah FIR ziah luh a ni. Police-te chuan chhui zui mek mah se, Christina Lalṭhazuali chu an la man lo.

Health department hotu­te hnen aṭanga Vanglaini thu dawn danin, document lem hman chung­chang hi an ngai thutak a, ngawihbopui chia an ngaih loh avangin FIR an thehlut a ni.

MZP chuan, National Health Mission (NHM) hnuaia thawk tur, February 23, 2023-a dental surgeon lak zingah document lem hmang an awm tih hriain, Health Minister hnenah hma la turin an ngen. Chumi hnu, June 5, 2024-ah document lem hmangtu Christina Lalṭhazuali chuan a hna aṭanga bànna a thehlut a, a tûkah thuneitute'n an pawm nghal.

Christina Lalṭhazuali hi dental surgeon anga NHM hnuaia a thawh chhungin Thenzawl PHC leh Kawnpui PHC-ahte a thawk a ni.