Health minister Rinpuii'n Kolasib damdawi-in a tlawh

Health & Family Wel­fare minister Lalrinpuii chuan August 1, Ningani khan Kolasib District Hos­pital a tlawh a, damdawi-in a fan kual bakah thawktute leh mi pawi­mawh dangte nen an inkâwm.

Health Minister chuan, doctor ṭhenkhat, ruihhlo vanga hna thawk ṭha thei lo an awm ṭhin nia sawi awm leh zauh ṭhin chu pawi a tih thu sawiin, doctor-te leh nurse-te chu taima taka thawk zel turin a fuih a, "Doctor-te lakah mipuiin beiseina sang tak an nei a, an ṭawngkam hi damlote tan damna leh thlamuanna tling a ni," a ti.

Kolasib District Hospital chu OPD leh IPD-a enkawl an neih aṭanga chhûtin Aizawl leh Lunglei tih loha Mizorama damlo nei tam ber an nih avangin ngaihtuah ngai bik nia a ngaih thu sawiin Lalrinpuii chuan, "Tun aia tam zawk specialist kan neih a, ward pawh mumal zawka kan neih hunah chuan hmun dang pan ngai loin damlo tam zawk in enkawl thei tawh ang," a ti a; damdawi-in hotute'n mamawh an lo thlente chu tih nghal theih a awm laiin, nghah ngai deuh turte an awm thu a sawi.

Health Minister hian Chief Medical Officer leh Medical Superintendent pisa leh ward-te a tlawh kual a; hmunhma, thawktu indaih lohna, khâwla indaih lohna leh harsatna an sawiah a theih ang anga hmalak a tum thu a sawi a ni.

Minister ṭawiawmtu Lalfamkima, deputy speaker leh bialtu MLA chuan, Kolasib district chu ramri dep a nih avangin sorkarin a ngaihsak a ṭul thu a sawi a; damdawi-in sak mek a nih avangin damlo ward enkawl a hautak thu leh thawktute'n harsatna an tawh ṭhin thu a sawi bawk.

Minister Lalrinpuii hian August 1 khan Lungdai PHC leh Kawnpui PHC te, Thingdawla School of Nursing te, Kolasib Vengthara Urban PHC dahna turte leh Kolasib Venglai East-a UPHC dahna tur hmun te, Social Welfare department-in Kolasib Vengthara Integrated Tribal Development Agency an sakna tur hmunte a tlawh nghal a; department hotute'n an ṭawiawm a ni.