PUC-ah Mizo ṭobul zirhona buatsaih: Mizote ṭobul leh thlangtlâk dante chiang zawk neih a hun - Sawivunga

Art & Culture department leh Pachhunga University College (PUC) History department chuan nimin khan PUC Seminar Hall-ah Mizo ṭobul chhuina leh zirhona an buatsaih a, Art & Culture minister C Lalsawivunga'n a hmanpui. Minister chuan, sorkar angin Mizote ṭobul leh thlangtlak dante chiang zawk neih a hun tawh thu a sawi.

C Lalsawivunga chuan, zirhona chuan Mizo history dik tak hriat kawngah rah ṭha a chhuah ngei a beisei thu a sawi a, "Mizo ṭobul leh thlangtlak dan chungchangah historian-te chhui zauna aṭangin thil hriat leh hmuh turte awm mah se, sorkar anga Mizo ṭobul leh thlangtlak dan kimchang mumal taka puan a la ni lo hi a veiawm. Ṭhangthar zingah Mizo chanchin chhui chian duhna, Mizo ṭobul kimchang hriat duh an awm zel hi a lawmawm," a ti.

Art & Culture Minister chuan, Mizo hnam pêng hrang hrangte ṭobul leh khawsak zui zel dante dik taka hriat a nih theih nan a hmuna kal chilha zir chian a pawimawh thu a sawi a, "Sorkar ang pawhin kan ṭobul leh thlangtlak dante kan neih a hun tawh a, tun aia fiah leh chiang lehzualin ziak ngeia dah theih tura ṭan lak a ṭul," tiin, ṭobul hriat chian chu inunauna tihngheh nan leh inpawhtlân nan a pawimawh thu a sawi.

International Symposium on Mizo Origin: Exploring Narratives of Origin and Migration' hawnna hi PUC History department HoD Dr Esther Laltlankimi'n a kaihruai a, PUC principal Prof. H Lalthanzara pawhin thu a sawi. Zirhonaah hian Mizo history lama tuimi te, college zirtirtu leh zirlaite an tel a, mithiamte'n thupui an sawi a ni.