Kalphung thar sorkarin mipui a tibeidawng - Congress Treasurer
Congress party chuan nimin khan Congress Bhavan-ah political session an hmang a; thu sawitu MPCC treasurer Dr Lalmalsawma Nghaka chuan, ZPM kaihhruai enchhin sorkar, kalphung thar sorkarin mipui a tibeidawng hle tawh niin a sawi.
Dr Lalmalsawma Nghaka chuan, sum inrenchem tih leh ZPM inhmeh lohzia tun hnaiah mite'n an sawi nasa nia sawiin, "ZPM hotute sorkara fawng chelhtute chhia leh ṭha hriatna an hmansual avangah ka ngai... Enchhin sorkar, kalphung thar sorkar kan tih hian mipuite an tibeidawng hle a, sorkar kal tate'n an tih ngam loh tur an rawn ti chho mawlh mawlh mai a ni," a ti.
MPCC Treasurer chuan, minister of state tlukpui mi pasarih an awm mek bakah, CM adviser panga, consultant-te an awm thu sawiin, "Board chairman duhsak zawng an indah hmiah hmiah a, heng zawng zawng ken telin sum a sen tur hi cheng nuai 1,34,145.84 a ni a, austerity measure an tih nen thil inhmeh lo tak a ni," a ti a; petrol leh diesel-a chhiah tihpun chu phurrit siam belhna a nih thu a sawi.
ZPM party mite'n party ruih chilh an nuihzat ṭhin nia sawiin Dr Lalmalsawma chuan, "Party ruih chilh nuihzat ṭhin ZPM worker ho hi vawiina party ruih chilh nasa ber an ni," a ti a; "Sum inrenchema an hlawhchhamna chhan pawh eng dang a ni lo, entawn loh tawp tur MNF sorkar kal ta tih dan an entawn vang a ni," a ti.
Dr Lalmalsawma Nghaka chuan, mipui an rûm mek nia sawiin, "Sawhthing chingtute’n an sawhthing a tam avanga rûm an tam hle a, vawk vulhtute an rum bawk. Kan kawngpuite hi a chhe lutuk. Heng harsatna hrang hrangte hi tu sutkiang turin eng nge kan tih? Sorkar hmasate puh loin mahnia tih ve mai hi hruaitu ṭha tih tur a ni," a ti a; mipui harsatna sukiangtu ni turin ram hruaitute an intihhniam a ngaih thu a sawi.
MPCC Treasurer chuan, Congress party chu mipui hamṭhatna thlir hram hram ṭhin a nia sawiin, "A chhe lai siamṭha turin theihtawp kan chhuah ṭhin. Congress chuan mipui tan hna kan thawk ṭhin. Zoram mipui chhan chhuak leh turin Congress hian theihtawp kan rawn chhuah dawn a ni," a ti.