Kolasib bawlhhlawh sawngbawlna mimal hnena hlan remtih a ni

Kolasib Town Sanitation Task Force chu an chairman Robert C Lalhmangaiha, bawrhsap hoin nimin khan an ṭhukhawm a; Dihmuntlanga Solid Waste Management Centre (SWMC) chu a thuphungin mimal kuta hlan (outsource) an remti.

Ṭhutkhawmah hian Dihmuntlanga SWMC chu a thuphungin mimal kuta hlan an remti a; felfai zawka bawlhhlawh khawn dan tur te, mipuite'n bawlhhlawh khawn man an chawi zat tur te, SWMC pannaa thing, kuhva kung leh oil palm-in electric hrui a tihbuai theihtea hmalak dan turte an rêl.

Kolasib khawpui tui tlan ber Tuichhuahen a thianghlim zawk nana hmalak dan tur te, ‘Save Tuichhuahen River Campaign’ chungchanga hmalak zel dan tur te, Kolasib khawpui tui tlan a thianghlim zawk theih nana mumal zawka septic tank paihna hmun buatsaih dan turte an sawiho bawk.

Ṭhutkhawma tarlan danin, Kolasib SWMC chu Model Solid Waste Management Centre-a puan tura hmalak ni mah se, a enkawlna tur pawisa dah hran (fund allocation) a awm loh avangin directorate aṭangin a hun takah fund an dawng lo ṭhin a, thawktute leh bawlhhlawh thliartu (sorter)-te hlawh/lawmman turah thla tin an buai ṭhin a ni.

Bawrhsap Robert C Lalhmangaiha chuan, Kolasib chu khawpui ṭhangduang tak a nih avangin bawlhhlawh leh hnawmhnawk a pung zel tih a sawi a, "Bawlhhlawh leh hnawmhnawkte hi buaipui tham a ni tawh a, felfai leh ṭangkai taka kan sâwngbàwl a pawimawh," a ti a; mumal zawka bawlhhlawh khawn leh sawngbawl dan turah UDPA department-in theihtawp chhuaha hma an lak thu a sawi.

Ṭhutkhawmah hian sorkar department hotute leh Kolasib khawpuia village council president-te an tel a ni.