Zirlaibu sem kim nghal loh zirlai ngaihsak lohnaah MZP-in an ngai

MZP chuan thuchhuah siamin, kum tina sorkar sikula zirlaibu sem ṭhinah harsatna a awm ziah chu an hriatthiam loh thu leh zirlaite ngaihsak tawk lohnaa an ngaih thu an tarlang.

MZP chuan nimin khan zirlaibu a thlâwna sem tur la sem kim loh chungchang pawh an rêl tih tarlangin, "Kum tina hetiang buaina thleng ziah hi a hrethiam lo hle a, zirlaite ngaihsak tawk lohnaah kan ngai. Kum tin buaina ni chunga chinfel tumna tak tak awm lo ṭhin hi sorkar thar hian ruahmanna felfai tak siam nghal se kan duh," an ti.

MZP hruaitute chuan nimin vêk khan Printing & Stationery kudamah zirlaibu thlen tawh dan an enfiah a; zirlaibu tam zawk a thleng tawh a, a la thleng lote pawh kawng lakah a thang mek tih an finfiah tih an tarlang. Zirlaibu chhutna atana Mizoram sorkarin cheng nuai 100 budget-a a dah chu lawmawm an tih thu an tarlang .

Mizoram-Assam ramri chung-changah MZP chuan, Mizoram ramri vengtu sipai camp panna kawng chhe lutuk leh kalpawh zung zung harsa lutuk chu ṭha taka siam vat turin Mizoram sorkar an ngen tih an tarlang bawk.