National Deworming Day thawh 2-na sawiho

Champhai leh Serchhip District Level Coordination Committee on National Deworming Day chu nimin khan an ṭhukhawm a; an district ve vea kum 1-19 inkarte'n rúlhût an pâi lohna tura rúlhût hlo pek beihpui thlakna leh rúlhûtin a nghawng ṭha lote inzirtirna, National Deworming Day thawh hnihna August 9, 2024-a kalpui dan tur an sawiho.

Champhaiah chuan district bawrhsap VL Remliana hoin an ṭhukhawm a; National Deworming Day (NDD) 2024 thawh khatnaah Champhai district (undivided)-a sorkar sikul 332, mimal sikul 106 leh anganwadi 288-ah rúlhût hlo pek beihpui thlak a ni a, naupang sikul kal lote pawh hmalakna hnuaiah hian telh vek an ni.

Champhaia NDD thawh khatnaah khan rúlhût hlo ei thei kum 1-19 inkar mi 52,318 zinga 51,623 (98.67%) hnenah rúlhût hlo (Albendazole) pek a ni a; NDD thawh hnihna kalpui leh turah kum 1-19 inkar mi 52,609 hnenah rúlhût hlo pek tum a ni.

Serchhipah chuan chief medical officer Dr LP Malsawma kaihhruaiin ṭhutkhawm a ni. NDD thawh hnihna chu Serchhip district-a zirna-in leh anganwadi centre hrang hrangah accredited social health activist (ASHA)-te nen ṭangkawpin kalpui a ni ang.

Serchhip district-ah hian National Deworming Day 2024 thawh khatnaah khan rúlhût pek tum zinga 97.7% pek a ni a, NDD 2023 thawh khatnaah target 96.96% leh thawh hnihnaah 99.35% tlin a nih thu an tarlang. National Deworming Day 2024 thawh hnihna neih turah kum 1-19 inkar mi 22,697 hnenah rúlhût hlo pek tum a ni.