CBI general consent pe turin phût

Mizo National Youth Front (MNYF) Headquarters chuan nimin khan Aizawlah Extended Meeting an nei a; Mizoram sorkar chu Central Bureau of Investigation (CBI) hnenah general consent pe turin an phût.

MNYF ṭhutkhawm hi an president Robert Romawia Royte, MLA-in a kaihruai a; resolution siamin, "Kan CM zahawm takin CBI-te general consent pek an nih tur thu leh CBI-te'n case chhui tura state sorkara phalna an dil a ngai loh tur thu Assembly House meuha a sawi hnu July 1, 2024-a Gazette Notification-a CBI-te'n ziaka state phalna an neih phawt loh chuan state sorkar hnuaia hnathawkte an chhui theih loh tur thu tarlan a ni leh si hi MNF ṭhalaite chuan general consent-ah kan pawm lo. CBI-te hi general consent dik tak pe ngam turin Mizoram sorkar kan phût tlat a ni," an ti.

MNYF RESOLUTION DANG

◆ Mizoram sorkarin mipui sáwr fê zawnga inrenchemna a kalpui laia anmahni erawh mipui sum tihek zawnga an inhaivûr reng si hi MNF ṭhalaite chuan a ṭha lo kan ti hle a. Mahni indahṭha daiha mipui lama inrenchemna kalpui si hi mipui sorkar ni loin, party sorkarah kan ngai.

◆ MNF sorkarin mipui mamawhna hriaa Mualkhang Bottling Plant tihlenna atana theihtawp a lo chhuahna rah tuna hmuh tur a lo awm ta hi lawmawm kan ti hle.

◆ Mizoram sorkar hian Vairengte kudam aṭanga kuhva rah bag sang tél bo tate kha a rang thei ang berin chhui chhuak se kan ti. Kuhva rah man sa mimal kudam leh hmun him tâwk loa awm mekte hi a bo ṭhen leh hmain sorkar hian a awmna tur dik tak, hmun him zawkah dah thuai se tih hi kan phût tlat a ni.