KHAWTHLIR

PM Vishwakarma

Khawzawl bawrhsap K Vanlalṭhiana hoin nimin khan DC meeting hall-ah India rama kut themthiam leh thil siam thiamte ṭanpuina leh khaichhuahna tura sorkar laipui scheme duan, PM Vishwakarma chungchang sawiho a ni. Sorkar hotu te, common service centre, Khawzawl District Village Council Association leh Khawzawl Joint VC Association aiawhte leh Neihdawn VC President-te an tel a; PM Vishwakarma inhrilhfiah a nih bakah, zawhna leh chhana hun hman a ni.

Lehkhabu tlangzarh

Environment Forest & Climate Change (EFCC) minister Lalthansanga chuan nimin khan Synod Conference Centre-ah M Sawmliana lehkhabu ziah, 'The Book of Mizoram Plants (Includes Wild Animal, Birds, etc.)' Third Edition a tlangzarh. Minister chuan, "Forest enkawlna chu India Danpui Concurrent List-a awm a nih avangin dan hnuaiah khuahkhirhna ṭha tak nen humhalh a ni a, chuvang chuan EFCC department hi namnûl mai chi a ni lo," a ti.

Thing ṭiak phun

Women & Child Development (WCD) hmalaknain nimin khan Thenzawl Common Poshan Vatika-ah 'Ek Ped Maa Ke Naam (A tree as tribute to my mother) and Plant4Mother' pualin thingphun rûnpui neih a ni a, WCD director Zoramthangi Chhangte-in a hmanpui. Environment Forest & Climate Change department-te nen thawkhoin thing ṭiak 50 chuang an phun a ni.

Assessment camp

Khawzawl DC Office leh Artificial Limbs Manufacturing Corporation of India-te'n Khawzawl district-a rualbanlo, Persons with Disabilities (PwDs)-ten hmanrua mamawh (aids and appliance) an neihte endikna, Assessment Camp an buatsaih a; Khawzawl district-ah ṭanpuina dawng thei mi 179 an awm tih hmuh a ni. Hmanrua an dawn turte chu - beng dar, wheelchair, TLM kit, walking stick, adjustable crutch leh braille kit-te a ni a, a vaiin Rs 14,24,446 man a ni.