Airport chungchanga rawtna siam turte'n Chief Minister-ah rawtna an thehlut tawh; Indian Air Force-ah bak beiseina a awm lo

Mizoram sorkarin Lengpui Airport mi dang hnena hlan leh hlan loh chungchanga rawtna siam tura a din Working Committee to Look into the Maintenance and Management of Lengpui Airport chuan Chief Minister hnenah report an thehlut tawh. Mi dang hnena Airport hlân turin Indian Air Force (IAF)-ah bak beiseina a awm loah an ngai.

Working Committee to Look into the Maintenance and Management of Lengpui Airport chairman TBC Lalvenchhunga, MLA chuan Vanglaini palai zawhna chhangin, "Kan rawtnate chu July 31, 2024 khan Chief Minister-ah kan thehlut tawh. A awm loh laia thehlut kan nih avangin vawiin (August 5) hian kan rawtna neihte CM kan hrilhfiah ang," a ti.

TBC Lalvenchhunga sawi danin, Committee chuan IAF, Airport Authority of India (AAI) leh mimal company-te an dawr a ni. Mimal company zingah chuan Lengpui Airport la chhâwng duh an awm lo.

AAI chuan a thlâwna lak chhâwn an duh a, hun eng emaw chen venhimna lam leh thil dangte Mizoram sorkarin a tum an beisei tel a; hei vang hian AAI kuta hlan chu Mizoram sorkar tan hlâwkna a awm dawn loa ngaih a ni.

Indian Air Force kuta hlan a nih erawh chuan Mizoram sorkar tana ṭhatna leh hlâwkna eng emaw a awm ve thei dawn a, thutlukna erawh siam a ni lo.

Committee chu rawtna thlen tur mai an nih thu sawiin TBC Lalvenchhunga chuan, "Kan Airport enkawl thei tura kan ngaihte kan dawr kualna leh inbiakna aṭangin rawtna kan siam a, keini chuan mi dang kuta kan Airport hlan ṭha kan tih leh tih loh kan thlen mai a ni. Thutlukna tak tak chu kan rawtnate aṭangin Chief Minister kaihhruaina hnuaiah siam tur a ni ang," a ti.

Working Committee to Look into the Maintenance and Management of Lengpui Airport-ah hian member secretary chu GAD Secretary a ni a, a kaihhnawih department hrang hrang aṭangin member an awm. June 2024 chhunga report thehlut tura tih ni mah se, an zawh belhnate AAI leh IAF ten an chhân har deuh avangin July chhung hun pek belh an ni.

January 11, 2024-a chief minister Lalduhoma hoa ṭhutkhawmnaah India rama airport dangte enkawltu leh an dinhmunte ngaihtuah chungin Lengpui Airport chu AAI hnenah nge, private company hnena hlan ṭha zawk dawn tih te, Mizoram tana hlâwk ber turte kil hrang hranga zir chiang a, khaikhinna chipchiar nei turin committee din an rêl a ni a, chumi ang chuan TBC Lalvenchhunga kaihhruai committee din a ni.