Mizoram sorkar cheng nuai 7,200 chawitir tum MBCC-in pawi an ti

Mizoram Business Coordination Committee (MBCC) chuan, Vairengte leh Sairang inkar NH kawngpui thlúr li-a siam turah contractor-te'n hmanrua leh bungrua an chhawp tawh chunga hna an thawh mai theih loh avanga cheng nuai 7,200 chawi tura Mizoram sorkar tih a nia sawiin, pawi an tih thu an tarlang.

MBCC thuchhuah chuan, "Mizoram kawtchhuah Vairengte-Sairang four lane siam turah contractor-in hna thawk turin hmanrua an inchhawp tawh a, eng emaw rokhawlhna avanga an thawh mai theih loh avangin sorkarah hna thawhna tur hmanraw dah mai mai man cheng nuai 7,200 lai mai chawi turin an ti a, pawi kan ti hle a ni," a ti.

Vairengte-Sairang kawng thlúr lia siam a nih chuan Mizote'n man tlâwm zawkin thil engkim an nei thei dawn nia sawiin MBCC chuan, "Zoram mipuiin nghakhlel taka kan thlir Vairengte-Sairang four lane kawngpui siam theih loha a awm leh contractor pawhin a lothlàwna cheng nuai 7,200 lai sorkar hnena a phût te, in withdraw mai an duh tih thâwm kan hriatte hi pawi kan ti a, thuneitute'n chingfel thuai se kan duh," tiin an tarlang.

MBCC chuan, Mizorama sumdawngte'n Income Tax atangin income tax pe tura tihna lehkha leh a dangte an dawng fo tih sawiin, "Income Tax lama thawktute leh dan hremite nen zirchianna zau zawk buatsaih tura hmalak mek a ni," an ti a; sumdawngte chu chî-âi lo tur leh harsatna neite chu MBCC hruaitute hnenah hriattir turin an ngen.

Tunlaiin Mizoramah hnam dang dan loa sumdawng an tam nia sawiin MBCC chuan, "Mizo hming hawha hnam dang dawr leh Mizo hminga hnam dang motor register zawng zawngte dan anga hrem an nih theih nan MBCC chuan hmalak kan tum a, Mizo hming hmantir zawng zawngte a rang thei ang bera titawp nghal turin kan ngen a ni," an ti.