Health care scheme hman mek September 30, 2024 thleng pawhsei a ni

Mizoram State Health Care Scheme hman mek chu ZPM kaihhruai sorkarin health care scheme a duan thar Mizoram Universal Health Care Scheme (MUHCS) hman theih a la nih loh avangin September 30, 2024 thleng pawhsei leh a ni.

MSHCS chuan June 26, 2024 khan circular tichhuakin, MUHCS peih a la nih loh avangin health care scheme hman mek chu July 2024 thleng hman chhunzawm tur a nih thu a tarlang.

July thla a ral hnuah pawh MUHCS chu hman theiha peih a la nih loh avangin MSHCS chief executive officer Dr Biakthansangi chuan August 1, 2024 khan hriattirna a tichhuak leh a, health care scheme chu September 30, 2024 thleng pawhsei a nih thu a tarlang a ni.

Health care scheme hlui hman chhunzawm tur hi April 2023 - March 2024 atana inziak lutte tan a ni a, policy-in a huam chin Rs 2,00,000 hmang zo tawhte tan erawh hman theih a ni tawh lo.

Health & Family Welfare minister Lalrinpuii sawi danin, MUHCS hnuaia inziak lutte'n sorkar aṭangin kum khatah Rs 5,00,000 thleng damdawia inenkawlna senso an hmu thei dawn a ni.