Champhai MZP-in zirna-in leh pisa kai turte an dang dawn

MZP Headquarters, Champhai chuan vawiin hian Champhai College-a zirtirtu indaih loh vanga lungawi lohna lantirna atan Champhai khawpui chhunga zirna-in leh sorkar pisaa kai turte an dang dawn a; bank leh damdawi-in OPD erawh an dang dawn lo thung.

Champhai MZP hian lungawi lohna lantirna atan August 2, Zirtawpni khan Champhai College-a zirtirtu leh zirlai kal turte an lo dang tawh a; an beisei ang thu lawmawm sorkar aṭanga an hmuh loh avangin vawiin hian zirna-in leh sorkar pisate an dang dawn a ni.

Champhai MZP chuan thuchhuah siamin, college zirlai leh zirtirtute an lo dan tawh thu an tarlang a, "August 3 khan sorkar nen inbiak a ni a, sorkar lam harsatna leh an tum dante hrilhhriat kan nih hnuah tun maiah chuan zirtirtu pek theih kan nih loh thu hrilh kan ni," an ti.

Champhai College-in zirtirtu a mamawh tawh dante ngaihtuah a nih hnuah zirtirtu hnawhkhah chu thil theiha an hriat avangin August 5, 2024 aṭangin Champhaia zirna-in leh sorkar pisa zawng zawnga kai turte dan an tum chu an kaltlangpui dawn tih Champhai MZP chuan an tarlang.

Champhai MZP chuan, an hmalakna chu Champhaiah zirnain hma a sawnna tur a nih avang leh zirlaite hmakhua an ngaih vang a nih thu tarlangin, an hmalaknaah ṭawiawm turin Champhai district mipui an ngen a; an hmalaknate thláwpa pisa leh zirna-ina kal tum lui lo turin Champhai mipui an ngen bawk.