2024-ah heroin kg. 89 man tawh; Ruihhlo vangin mi 44 an thi tawh

Kumin January aṭanga July thleng khan Mizoram Police leh Excise & Narcotics department chuan heroin kg. 89.317 an man tawh a; ruihhlo vangin mi 44 an thi tawh.

Thu dawn danin, Mizoram Police chuan January-July, 2024 chhungin heroin kg. 57.126 an man a, Excise & Narcotics department-in kg. 32.191 an man thung.

Excise & Narcotics department chhinchhiah danin, January-July, 2024 chhungin ruihhlo hmansual avangin mi 44 an thi tawh a, chu'ngte chu mipa 37 leh hmeichhia pasarih an ni. Ruihhlo vanga thite chu heroin ti leh heroin leh damdawi dang ti kawp vek an ni.

Mizoramah ruihhlo vanga thi chhinchhiah hmasak ber kum chu 1984 kha a ni a, mi pakhat a thi. Kum 1984 aṭanga July 31, 2024 thleng khan ruihhlo vangin mi 1,854 an thi tawh. Chhinchhiah danin, kum 1984 hnuah kum 1986 khan ruihhlo vanga thi an awm lo a, kum dang zawnga chuan thi an awm a ni.