Phullenah Chalfilh bial MLA office hawng

Assembly speaker Lalbiakzama chuan August 3, Inrinni khan a bial, Chalfilh constituency chhunga Phullen khuaah Chalfilh bial MLA office a hawng a; MLA pisa hawnin a tum bulpui chu bial mipui ban phâka indah a nih thu a sawi.

Lalbiakzama chuan, MLA office chu bial mipui ta a nih thu sawiin, "Pisa hawn tharin a tum bulpui chu bial mipui ban phâka indah a ni. Sorkar kalphung atana ruahman chu mipui ban phâka awm maiah a tâwp lo a, mipui vawn tura bán theh chhuak a, va vuantu leh an mamawhte tihsak tura Bána Kaih Policy hmanga mipui khai chhuah a ni. Mi harsa leh mi tê ber pawh an harsatna hriatpui turin mipui hnaih thei ang leh mi náwlpui nghêng phâka awm a ṭul," a ti.

MLA office chuan Chalfilh bial mipuiin Aizawl dàwr tura hun, thâ leh sum tam tak an sèn ṭhinte a sukiang dawn nia sawiin Lalbiakzama chuan, "MLA chauh hman tur ni loin, bial chhung mite'n bial tana hnathawhna hmun, bial mite tana in pui a ni dawn," a ti a; Mizoram sorkar chu mipui sorkar a nih angin MLA-te chu an bialah a tam thei ang bera awm tura beisei an nih thu leh mipui ban phâka inchhawp hnaih chu sorkar rilru a nih thu a sawi.

Assembly Speaker chuan, "State department sum piah lamah central scheme leh project chi hrang hrang aṭanga sum hai luh tumin he bial tan hian theihtawpin ṭan kan la a, ruahmanna thehluhte pawh a changtu department lamah theihtawpin an nawr zui ṭhin," a ti a; Chalfilh bial chu bial dangte tana entawn tlaka siam a duh thu a sawi bawk.