Champhaiah Trade Expo buatsaih

Zorun Events chuan August 3, Inrinni khan Champhaia Vanlallawma Indoor Stadium (VANIS)-ah 1st International Mizoram Trade Expo an buatsaih ṭan a, Champhai additional DC K Zorammuana'n a hawng.

International Trade Expo hi August 24, 2024 thleng buatsaih a ni dawn a; India ram chhung leh páwn aṭangin sumdawng eng emaw zat an tel. Expo neih chhung hian chawhma dar 10 aṭanga zan dar 8 thleng mipui tlawh theiha hawn a ni ang.

K Zorammuana chuan, Expo chu sumdawnnaa ngaihtuahna thar petu, Mizo sumdawngte leh hnam dangte inkara inlaichìnna ṭha siamtu ni se a duh thu a sawi a, "Mizoram hi Myanmar leh Bangladesh ramrite'n an hual a, Kaladan Multi Modal Transport Transit Project a puitlin hunah chuan khawmual leh tuipui kaltlangin Asia chhimchhak ramte leh Bangladesh tan India ram kawtchhuah a la ni thuai dawn a, chumi hun atan chuan tun aṭanga inpuahchah a ṭul," a ti.