KHAWTHLIR

Ṭanpuina hlan

YMA, Armed Veng Branch chuan August 3, Inrinni khan an din champha vawi 55-na pualin Ṭawngtai Bethel Camping Centre, Sakawrtuichhun hnenah buhfai ip 10 leh dailuah ip hnih an hlan. Armed Veng Branch YMA hi August 3, 1969-ah din a ni a, member 1,923 awm mekin, mipa 1,211 leh hmeichhia 712 an ni.

CṬP jubilee lawm

Catholic Ṭhalai Pawl, St Mary's Branch chuan nimin khan kum 50-na, golden jubilee an lawm a, Aizawl bishop Most Rev. Stephen Rotluanga'n hmanpuiin, jubilee lungphûm a hawng. CṬP, St Mary's Branch hi Mizorama CṬP ding hmasa ber a ni a; golden jubilee pual hian Mizoram pum huap malzaia inelna (Fakzai Intihsiak), futsal tournament, ṭhutmuan rimawi leh concert-te an lo buatsaih tawh a ni.

Parade dawn

Mizoram police-te'n taksa chak ṭha leh hriselna ṭha zawk an neih theih nan beihpui thlak a ni dawn a, a bul ṭanna atan tukin zing dar 7 aṭangin Mizoram puma police-te a rualin an awmna hmun ṭheuhah minute 45 chhung an parade dawn. Aizawlah chuan 1st Bn. MAP Playground, Armed Vengah Home minister K Sapdanga hoin hun hman a ni ang.

Fimkhur turin chah

District hrang hranga bawrhsapte chuan nimin khan thuchhuah siamin, ruahsur nasa vanga chhiatna thleng thei laka fimkhur turin mipui an chah. DC-te chuan, "India Meteorological Department bulletin August 3, 2024-a tihchhuahin a sawi lâwk danin, August 4-10, 2024 chhung hian Mizoram hmun hrang hrangah ruah tam tak sûr thei a nih avangin ruahsûr nasa vanga chhiatna thleng thei laka fimkhur turin mipui kan inchah a ni," an ti.

Harhna khawmpui

Mizoram Synod chuan August 2, Zirtawpni zan aṭang khan Saron Veng Kohhran biak-inah Harhna Inkhawmpui vawi 10-na an buatsaih a, nizan khan a ṭiak. Inkhawmpui hi Synod revival speaker leh counsellor-te intuaitharna atana buatsaih a ni a, thupui chu 'Nunna chu thlang rawh u' tih a ni. Synod Revival hnuaiah revival speaker 70 an awm mek.