Aizawl hmasawnna turin AMRUT hnuaiah Mizoramin cheng nuai 750 a hmu tawh

Khawpui tihhmasawnna tura duan, Atal Mission for Rejuvenation and Urban Transformation (AMRUT) hmangin Mizoram sorkar chu Aizawlah hna thawk ṭan turin an inbuatsaih mek. AMRUT hnuaiah hian Mizoramin cheng vbc. 40.55 a hmu dawn a, first instalment cheng nuai 750 a hmu tawh.

Aizawla AMRUT hnuaia hna thawh tur chungchangah hian nodal department UDPA director Zorammuana chuan June 25, 2016 khan Aizawl Press Club-ah thuthar thehdarhtute kâwmin a sawifiah a ni.

Zorammuana sawi danin, AMRUT hi June 25, 2015 khan Ministry of Urban Development-in a tlangzarh a, India rama khawpui 500 tihhmasawnna tur niin, chu'ng zingah chuan Aizawl pawh a tel. AMRUT hnuaia hmalakna turte chu hlawm pangaah ṭhen a ni. Tui (water supply), tuihawk luan dan chinfel (sewerage & storm water drainage)-te chu PHE department-in an buaipui ang a; khawpui chhunga veivahna lam (transport) leh intihhlimna hmun (green space & parks)-te chu UDPA-in an buaipui thung ang.

AMRUT hnuaiah hian Aizawl tan cheng vbc. 40.556 dah a nih thu sawiin, Zorammuana chuan, sorkar laipuiin cheng vbc. 36.5 (90%) tumin, Mizoram sorkarin cheng vbc. 4.056 (10%) a tum dawn tih a sawi a, "Sum pek chhuah dan tur chu 20:40:40 a ni a, tunah hian 20% cheng vbc. 7.5 chu dawn tawh a ni," a ti.

UPDA Director chuan, Ai-zawl bakah, Lunglei khawpui pawh AMRUT hnuaia chei a nih theih nan ṭan an la tih a sawi a; mahse, mihring nuai khat tal chenna khawpui nih a ngaih avangin Central lama hotute'n an pawm thei ta lo niin a sawi a ni.

Zawhna chhangin UDPA hotute chuan, sum hmuh tur zinga first instalment cheng vbc. 7.5 chu Central-in November 20, 2015-ah Mizoram sorkar hnenah a rawn pe a, chu'ng zinga cheng nuai 73 chu Mizoram sorkara Finance department-in nodal department hnenah a pe tawh tih an sawi.

UDPA hotute chuan, green space & park hnuaia hna thawh tur zingah Aizawl City Park chu chei ṭhat vek a ni dawn a, chumi tur chuan Aijal Club hotute nen pawh an inbe tawh tih an sawi a; urban transport hnuaiah hmun hrang hrangah ke-a kalnate siam-
ṭhat a ni dawn a, hna thawhna hmun turte pawh an thlang tawh tih an sawi bawk.

Zorammuana chuan, PHE lam chan turah pawh DPR siam vek tawh a ni tih sawiin, UDPA leh PHE hnuaia hna thawh turte chu Aizawl Municipal Corporation (AMC)-in an thawk dawn tih a sawi a; khawpui tihhmasawnna tura Central-in a duan dang, Smart City nen kaihkawp tum a nih thu leh, SIPMIU-te nen pawh an sawiho fo tawh thu a sawi a ni.

AMRUT hnuaia sum hmuh dan tur

# Hmuhna tur Central State Total First

Share Share Instalment

1. Water supply Nuai 365.00 Nuai 40.60 Nuai 405.60 Nuai 73

2. Septage management Nuai 365.00 Nuai 40.60 Nuai 405.60 Nuai 73

3. Water drainage Nuai 2336.00 Nuai 259.60 Nuai 2595.60 Nuai 467

4. Urban transport Nuai 492.80 Nuai 54.80 Nuai 547.50 Nuai 99

5. Green space & park Nuai 91.30 Nuai 10.10 Nuai 101.40 Nuai 18