Remna Ni pualin Peace Rally neih a ni

Central YMA chuan kumin June 30-a Remna Ni kum 30-na lo thleng tur pualin Aizawlah Peace Rally an huaihawt a, Aizawla YMA branch hrang hrangte'n Lammual panin kawng an zawh.

Peace Rally-ah hian Aizawla YMA branch-te chuan hmun hrang hrang aṭangin Lammual panin kawng an zawh a, Lammualah lut khawmin, zing dar 8-ah inkhawm tâwi neih a ni.

Lammuala inkhawm hi Cen-tral YMA finance secretary Lalro-chhuanga'n a kaihruai a; Peace Rally an buatsaih chhan chu, remna leh muanna hlu tak chu mipuite'n a hlutzia an hriat lehzual theih nan a nih thu sawiin, "Eng political party emaw hamṭhat nan leh chhiat phahna tura buatsaih a ni lo. Remna hi a hlu em a, chuvang chuan Remna Ni hi kan lawm a ni," a ti.

Peace Rally-ah hian mi 2,000 vel an tel a; Mizoram remna leh muanna atan ṭan an la zel dawn tih lantir nan thutiam an chham rual. Kal khawm zawng zawngte hnenah Central YMA chuan momento a pe a ni.