SIM card hralh phal a ni lo

Lunglei SP mawh-phurhna la mektu additional SP J Lalmuankima chuan thuchhuah siamin, mobile phone service provider-te'n SIM card black-a an hralh chhuah phal a ni tawh lo a, a ruala SIM card book vak ang chi pawh phal a ni tawh lo tih a tarlang.

Lunglei addl.SP chuan, June 6, 2016-a DGP Thiang-hlima Pachuau hoa Mizoram police officer-te ṭhukhawm thurel ang-in, Ministry of Home Affairs leh Department of Telecomunication Guidelines zûlzuiin June 23, 2016-ah Lungleia telecom service provider-te leh police-te'n SP pisaah meeting an nei a; an thuchhuak angin SIM card chungchanga thu thar chu an puangzar ta tih a sawi.

Police thuchhuah chuan, "Tun hnuah chuan SIM card book tur reng rengin ama ta tur ngei a ni tih chian nan VCP emaw police station OC emaw hriatpuina an la vek tur a ni a, mahni hming ni loa book prepaid SIM card hmangtute'n thla thum chhungin anmahni hmingin an thlak vek tawh tur a ni. Hemi atan hian mahni SIM card neihna company a zawh chian theih ang. Hetianga ti lote chu an chungah action lak a ni tawh dawn a ni," a ti.