Pre Matric Tribal Scholarship dil zat pe thei lo MSB-in tuna an sem bak an sem thei rih lo

Mizoram Scholarship Board (MSB) secretary JH Zoremthanga chuan, nikuma scholarship an dil zinga mi, pawl 1-10 inkar zirlaite'n Pre Matric Minority Scholarship leh pawl 9 leh pawl 10-in an dil theih pakhat dang, Pre Matric Tribal Scholarship-te chu an dil zat sorkar laipuiin a pek loh avangin tuna an sem bak chu sem theih a ni rih lo tih a sawi.

JH Zoremthanga chuan zirlaite'n scholarship an hmuh chungchangah, "Kan tih tur chin chu kan ti vek. Kan dil ang zat sum min pek loh ang tho hian state dangte pawh an buai vek avangin nikuma scholarship aṭang hian India ram pumah 40% bak an la pek chhuah kan ring lo," a ti a; zirlaite'n an la dawn loh chu sorkar laipuiin rawn pek zel an tum niin Vanglaini palai a hrilh.

JH Zoremthanga chuan, Central aṭanga scholarship dil dan rawn thlak danglam a nih avangin theihtawp an chhuah thu te, ministry aṭanga portal an thlak fo vanga an buai phah thu te, thil an tihfel hnu lawkah an thlak danglam leh ṭhin avangin scholarship buaipui chu a hautak hle thute a sawi.

MSB Secretary-in Vanglaini palai a hrilh danin, nikum aṭanga kalphung thara kal a nih avangin Central-in form-te online-a thehlut vek tura a tih laiin, zirlai tam tak tan a harsat avangin offline-a dilte chu online-in an buaipuisak zel. Central-in online-a a tih chhan chu, scholarship scheme hrang hrang 39 awmah chi hnih lo dilte an awm ṭhin vang leh scheme pakhatah chiah dil a nih theihna atana hmalakna a ni.

Pre Matric Minority Scholarship atan zirlai lut thar (fresh) mi 2,265 tan leh renewal mi 10,019 tan, a vaiin mi 12,284 tan chiah Central-in scholarship tur sum a rawn pe rih a, sum a rawn pek zawng zawng chu Rs. 2,98,40,500 a ni. Chutih laiin, MSB-in scholarship an dilsak zawng zawng chu zirlai 1,20,000 vel an ni a, dilna tihfel a nih hnuah Central-ah an thawn vek a ni.

Pre Matric Minority Scholarship atana sum an dil Central-in a rawn pek kim theih loh avangin Aizawla Minority Secretary a lo kal ṭum pawhin harsatna an lo thlen tawh a, Central pawhin rawn pek chhunzawm zel a tum thu an hrilh tawh tih sawiin, JH Zoremthanga chuan, "June thlaah hian meeting koh an tum a, account system a nih avangin hun khaihlak leh thil inthlak danglam lai a nih avangin min pe kim thei rih lo a, keini lam chuan kan tih tur kan ti vek a ni," a ti.

Hetih lai hian, pawl 9-10 zirlaite'n an dil theih dang, Pre Matric Tribal Scholarship chu sorkar laipuiin a la rawn pe lo hrim hrim thung.

Pawl 11 chin chung lam zirlaite lak ṭhin Post Matric Tribal Scholarship-a harsatna an tawhte sawiin, JH Zoremthanga chuan, "Pawisa lo thleng hi a vaiin vbc. 49 vel a ni. Direct Benefit Transfer (DBT) angin zirlaite account-ah kan thun a, February 10, 2016 aṭang khan kan thun ṭan a, kumin February thla chhung khan 90% chu zirlaite account-ah kan thun zo hman. Account-a kan thun tawh si, pawisa pawh hmang ṭhen tawh mi ṭhenkhatin la lut lo anga rawn complain an awm a, kan rinawmna kan lantir a ngai a ni," a ti.

MSB Secretary sawi danin, Mizoram chhung leh state danga Mizo zirlai mi 6,200 vel chu an bank account thih tawh vang te, account-a sum awm loh vanga dah theih loh vangte leh chhan dang vangtein thunsak theih a ni lo. Complaint hun hawn a ni a, complain-te chu bank aṭangin statement an la a, mi tam tak tihfelsak tawh mah se, ṭhenkhat chu a la fel thei lo. Ṭum ruk vel thunsak tuma an buaipuite pawh an awm a, zirlai pawlte nen sawiho hnuah district bik chan insemin, zirlai harsatna tawkte chu an buaipui a ni.

Complaint hun an siamah hian chawlhkar liam ta thleng khan zirlai 300 chuangin complaint an thehlut a, chu'ngte chu an principal-te leh zirlai hruaitute hriatpuina nena an endik hnuah sum faiin an lo pe chhuak a ni. Post Matric Tribal Scholarship bika harsatna chu a fel thawkhat tawh niin an sawi.