KHAWTHLIR

Thisen pe

Mysore Mizo Welfare Association chuan an kum 10-na pualin Inrinni khan Aizawl Civil Hospital-ah thisen an pe a, mipa paruk leh hmeichhia pahnihin an pe a ni.

Thing phun

Inrinni khan Champhai district leh Lawngtlai district-ah thing ṭiakṭhahnem tak phun a ni. Champhaiah chuan Champhai Welfare Committee bultumin District Hospital-ah thing phun a ni a, Lawngtlai district-ah chuan Lawngtlai RD Block hnuaia IWMP Project-V hmalaknain an khaw enkawl - Thingkah, Mampui leh Ngengpuikai-ah te thing phun a ni.

MVA-in chawimawi

Lalrintluangi, Dawrpui Vengthar Volleyball Club member, khawvela tlang sang ber, Mt. Everest chhípa láwn chhuak chu Mizoram Volleyball Association chuan Inrinni khan an pisaah an chawimawi. MVA president Dr Lalmalsawma Nghaka chuan, Lalrin-tluangi tumruhna leh tawrhchhelna fakawm a tih thu sawiin, "Mizo nula kan volleyball player hian chawimawi a phû a ni," a ti. MVA hian chawimawina thuchei, tangka fai leh volleyball an pe a ni.

PRRS campaign

AH&Vety department chuan nimin khan Darlawn Vawkpui Vulh Association-te pualin Darlawnah PRRS awareness campaign an buatsaih. Darlawn Vawkpui Vulh Association hian tun dinhmunah vawkpui 112 an vulh mek a, kumin chhungin vawk notê cheng nuai 44.48 man an hralh tawh a ni.

Sponsorship sem

Champhai District Child Protection Unit (DCPU) chuan tun hnai khan sponsorship an sem chhuak. Champhai DCPU hian naupang 83 hnenah zirna tih-hmasawnna atan te, hriselna tihhmasawnna atan te, ei leh in ṭha zawk an hmuhna atante leh an mamawh dang phuhrûkna atan sumfai a pe chhuak ṭhin a ni.

Sikul himna zirtir

Lunglei District Disaster Management Authority chuan June 24, 2016 khan Lunglei DC confe-rence hall-ah sikul thlan bikte tan 'Workshop on School Safety' an buatsaih a; School Disaster Management Plan siam dan te, mock drill neih dan leh chhiatrupna laka inven dan turte an zirtir.