A páwng a puiin Hindu sakhua kan bei lo Kohhrahte humhim kan tum: Synod Exe.Secy

Tun hnaia Yoga chungchanga inhnialna awm mekah Mizoram Synod hruaitute chuan, Hindu sakhua chu a páwng a puia an beih loh thu leh Hindu zirtirna lakah kohhran mite humhim an tum mai zawk thu an sawi.

Vanglaini palaiin a kawmnaah Synod executive secretary Rev. B Sangthanga chuan, kohhran rawngbawltute zingah pawh Yoga chu thil pawi loa ngai an awm nia an hriat thu leh Yoga chu Hindu sakhua nena inphan tlat a nih avangin fimkhur a pawimawh thu a sawi a; "Yoga-a physical excercise hian Hindu philosophy a keng tel a, rilru leh taksa damna chu mi tam takin an lo chang a nih pawhin, Hindu sakhaw zirtirnaa intulut kher lo turin kan duh a ni," a ti.

Rev. B Sangthanga sawi danin, Yoga chungchang nikum lama thâwm a awm ṭan aṭangin Synod Research & Evaluation Wing-in an zir chiang a, seminar-te an buatsaih a, Presbyterian Church of India (PCI)-ah pawh an thlen tawh a ni.

Tun hnaiah Central-ah sorkar a inthlak avangin zirna-in leh police-te hnenah Yoga kalpui tur tih thâwm a awm avangin an ngaihven thar zual nia sawiin, Rev. B Sangthanga chuan, Mizoram chief minister pawhin hma a lak tawh thu a sawi a, "Madhya Pradesh leh Rajasthan-a zirna-inahte Yoga kalpui a nih avangin Mizoram CM pawhin India President hnenah ziakin a lo thlen tawh a, sakhaw thil bik kalpui a nihnaah inrawlh tura a ngenna lam a ni," a ti.

Synod Executive Secretary chuan, tun hnaiah Assam state-a PCI zirna-in pakhatah Hindu puithiam ṭum hnih a kal a, principal chuan zirna-ina Yoga an tih theih loh thu leh Board thuneihna a nih avangin anmahni ráwn lo chuan a kalpui ngam loh thu a lo hrilh niin a sawi.

Synod Campus Ministry-a director Rev. Lalchungnunga chuan, Yoga-ah Hindu philo-sophy thûk tak a inphûm ngei nia sawiin, "Hindu-in taksa péng a hriat dan te, mutchhuak tihreh dan te, ni (sun) pathian chibai bûk dante chu malsawm dilna a ni a, fimkhur a ngai," a ti.

Synod Campus Ministry Director sawifiahnate

1. Yoga chuan mahni inngaihtuah bingna thûk tak aṭanga pathian nihtir tumna a neih laiin, Bible-chuan mihringin Pathian nih a tumna emaw, an lehzual a tumna emaw, mahni indah sânna chu sual lian ber a nih thu a sawi.

2. Yoga hi taksa insawizawina satliah mai a ni lo a, thlarau lam insawizawina a ni a, a thlarau mi dan hi Kristiante thlarau mi dan nen a inang lo.

3. Kundalini Yoga chu Kristian zirtirna nen a inkalh tlat a, chhandam nana mihring theihna (power) kaihthawh tumna a ni.

4. Yoga-in pathian a sawi chu, mîze nei lo (impersonal) a ni a, Kristiante Pathianah chuan Pathian mîze nei, lei leh van siamtu leh mahni leh mahnia inpuang ṭhin a ni.

5. Yoga-in mihring a dah dan leh Kristian en' mihring kan dah dan a inang lo. Yoga-ah chuan pathian ni thei turin mihring a dah a, Kristianna chuan Pathian chu a thil siam zawng zawng laka hrang, Amah zawm theitu awm lo a ti.

6. Bhagavita Gita 18:17-ah chuan, Yoga lalpa chu Krishna a ni (Krishna, the lord Yoga) tih a sawi.

7. Yoga hi Hindu lehkhabu thianghlim (Vedas, Upanishads, Bhagavat, Gita, etc) tea a lan danin, chhandamna (moksha) zawnna kawng a ni. AC Bhaktivedanta Swami Prabhupada (International Society for Krishna Consciousness ISKON) dintu pawhin, "Yoga chu Krishna hriat theihna kawnga rahbi pawimawh a ni," tiin a sawi.

8. Yoga-in a tum bulpui ber chu pathian thlarau leh mihring thlarau inzawmtir a ni a, chu chu Kristiante chhandamna nen a inang lo.

9. Yoga hi sakhaw thil nen a inzawm avangin Compulsory Teaching of Yoga hi ṭha kan ti lo.

10. Khawthlang Kristian ṭhenkhatin Yoga an lak luhna chu Swami Vivekananda-in 1863-a Parliament of the World's Religion-a a tel ṭum a, Hinduism leh Yoga a hrilh darh aṭangin a ni a; Kristian rinna chhungah eng emaw chen la lut an awm a, Kristianna ei daltu a ni mek.