Sports infrastructure-ah kan duai lo : CM

United Sports Association of Mizoram (USAM) chuan June 25, 2016 zan khan Ignite Studio, Khatlaah infiammi hlawhtlingte hnenah award an sem a; award semtu chief minister Lal Thanhawla chuan, Mizoram chu infiamna hmunhma (sport infrastructure) lamah India ramah a duai lo niin a sawi.

Chief Minister chuan, sorkar kal ta leh tuna sorkar kal mekah hian sport association hrang hrang hmalakna leh Sports Minister hmathlir ṭha tak avangin Mizoram chu infiamna ruhrel leh ruangám hmarchhak state zinga a nei ṭha pawl ber a nih tawh niin a sawi a, "India ramah pawh kan duai lo a, hengte hi
ṭhalaite'n chonaah pawmin hma sawn a, an hmakhua siamna atan hmang se la kan duh a ni," a ti.

Lal Thanhawla chuan, natio-nal level mai ni lo, international level-ah Mizo infiammi an lang ṭhin chu malsawmna ropui tak a nih thu sawiin, "Hei hi an tum-ruhna, an inthununa leh an teirei peihna rah a ni," a ti a; infiammi leh anmahni en-kawltu pawlte chu kawng tinrenga an nun uluk leh fimkhur tura chahin, mi dangte tan entawntlak ni turin a fuih.

Sports minister Zodin-tluang-a pawhin thu sawiin, chan-chinbute leh electronic media, a bikin LPS leh ZONET Cable-te'n infiamna lam chanchin an ngaihven a, an puanzarna lamah nasa taka ṭan an la chu lawmawm a tih thu a sawi a, "Sports lama hmasawnna a awm zel theihna atan sport administrator-te inpekna chu ropui a, mahni tan hlâwkna awm loin infiamna khawvela Mizoram a ṭhan zel nana an inpekna leh an hnathawh hi a lawmawm a ni," a ti.