Minister-in Vairengtea hnathawh a tlawh

Minister R Lalzirliana chuan Inrinni khan Vairengtea sak mek market building, Vairengte Police Station grade IV leh police quarters type-II sak mekte a tlawh a, hna thawh dan a enfiah.

R Lalzirliana chuan, Vairengtea hmasawnna hna thawk mekte chu a ṭha thawkhata a hriat thu sawiin, "Hna hi a hun taka zawh theih chu duhthusam ni mah se, harsatna hrang hrang vanga theih loh cháng a awm thei," a ti a; contractor-te chu mipui mamawhna hre chunga chak tak leh ṭha taka thawk turin a chah.

Vairengtea market building sak mek hi NLCPR aṭanga sum hmuh cheng nuai 337.7 hmanga sak a ni a, November 2015-a thawh ṭan niin, 50% thawh zawh a ni tawh.

Police quarters type-II hi October 2015 khan sak ṭan niin, 54% zawh tawh a ni a, a sakna atan cheng nuai 71.1 ruahman a ni. Vairengte Police Station grade IV sakna atan cheng nuai 153.6 ruahman a ni a, March 2016-ah hna thawh ṭan niin, 4% thawh zawh a ni tawh.