KHAWTHLIR

Aizawl West-II bial-tu MLA Lalruatkima, minister of state chuan nimin khan a bial chhung a Aizawl Smart City scheme hnuaia hna thawh tur hrang hrang a enfiah. Lalruatkima 

chuan, hmasawnna ruhrelte chu khawtlang mipui tana ṭangkai leh huam zau thei ang ber tura tih a nih thu sawiin, "Multi level car parking leh indoor stadium chei ṭhat turte hi amah leh amah inenkawl zui thei a nih theih nan ngaihtuahna sên a ṭul," a ti a; Smart City hnuaia hmasawnna hna thawh turah Aizawl West-II chhunga khawtlang hruaitute chu sorkar hmalakna thláwp turin a sawm.

Nimin khan Mamit College-ah Entrepreneurship Development Centre (EDC) Mizoram hnuaiah Innovative Challenge on Sustainable Business Solution to Development training buatsaih a ni a, district bawrhsap Dr Lalrozama'n a hawng. Training-ah hian mithiamte'n zirlaite thil pawimawhte an hrilhfiah a, vawiinah chhunzawma zawh a ni ang.

Sinlung Hills Council Act, 2018 Section 5(3) leh Sinlung Hills Council (SHC) Chief Executive Member-in nomination a siam angin, Thangliensung chu SHC-a nominated member a ruat a ni. Hemi chungchangah hian GAD chuan February 5, 2020 khan hriattirna a chhuah a ni.

MSU chuan a din champha vawi 19-na pualin nimin khan TNT, Zuangtuiah ṭanpuina sum leh buhfai ṭhahnem tak an hlân. TNT-ah hian mi 1,855 an awm mek niin an tarlang.

MNF ṭhalai, Mizo National Youth Front (MNYF) office bearer hlui leh tharte chuan nimin khan Mizo Hnam Runah mawhphurhna an inhlan. MNYF-ah hian president ni lai Lalrinawma, MLA chu president a ni zui dawn a, vice president ṭhin H Ramdinliana leh Lalremruata Chhangte te chu Lalzahawma Khiangte, treasurer ni laiin a thlak a, treasurer atan H Lalroliana dah a ni.