SEDP kan peih ṭêp - Dr Thangtea

MNF vice president leh MNF Programme & Policy chairman Dr R Lalthangliana chuan, an party policy thar, Socio-Ecomomic Develompent Policy (SEDP) chu an peih ṭêp tawh niin a sawi.

Nimina Mizo Hnam Rûna inkhawmah thu sawiin, Dr R Lalthang-liana chuan, policy & programme uluk takin an duang mek tih a sawi a, "Policy kan duan mek hi Mizo mipui zawng zawngin hamṭhatna an dawn vekna tur a ni a, tihhlawhtlin theih loh tur manifesto induan ṭhatsiak hi kan tih dan a ni ve lo. Keini chuan kan tihhlawhtlin theih ngei tur mi tin huapzo policy & programme kan duang mek a, vote zawn nan mai a ni ve lo a, mipuite khaichhuahna tak tak a ni dawn,” a ti.

Dr R Lalthangliana chuan, NLUP chu a dawngtu zinga 10% pawhin a hlawhtlinpui loa a lan thu a sawi a; kum 10 MNF sorkar chhungin hna an thawk nasa hle nia sawiin, "Hmasawnna ruhrel dinah phei chuan MNF thil tih kha a ropui lutuk," a ti a, Congress sorkar ding mekin a elpui tur hmasawnna ruhrel siam an nei lo niin a sawi.

MNF Vice President chuan, New Capital Complex, Durtlang kawng, Millennuim Centre, Ch.Chhunga Bus Terminal leh Ch.Saprawnga Truck Terminal-te chu MNF hun laia thawh vek a nih thu a sawi a; MNF sorkar laiin IR battalion thar pali an din theih laiin, Congress sorkarin a la din ve thei lo tih a sawi bawk.