MSACS-in syringe 1,76,700 a sem

MSACS project director Dr Lalmalsawmi Sailo chuan, nimin khan an pisa aṭangin HIV/AIDS dona kawnga hma latu NGO-te hnenah targertted intervention (TI) hnuai aṭangin hmanrua - hriau (syringe) a sem chhuak.

MSACS pisa tuala hriau sem dawnah thu sawiin, Dr Lalmalsawmi Sailo chuan, Mizoram MLA 40-te'n Mizorama HIV darh zel tur venna kawnga sum an thawh chu lawmawm a tih thu a sawi a, "Sorkar laipui aṭanga HIV dona programme suih têt a nih mek laia kan MLA-te hmalakna hian thawktute nasa takin min tiphûr a ni," a ti. NGO-te chu HIV/AIDS dona kawnga ṭhahnemngai taka thawk zel turin a chah.

Nimina syringe sem tak lei nan hian Mizoram Legislative Forum on AIDS kaltlanga MLA 40-te'n Rs. 1,00,000 ṭheuh an thawh khawma Rs. 40,00,000 tlingkhawm aṭangin Rs. 12,00,000 hmanga lei a ni a; Aizawl, Serchhip, Mamit leh Kolasib district-a NGO 19 hnenah hriau leh syringe 1,76,700 sem a ni.

MLA-te sum thawh cheng nuai 12 hmang hian MSACS chuan hriau leh syringe 2,53,180 a lei a, nimina an semna district bakah hian, Lunglei, Champhai, Saiha, Lawngtlai leh Serchhip-a NGO-te hnenah 76,480 an sem leh ang.

NGO aiawha thu sawi-tute zinga mi Dr Chawnglungmuana, SHALOM chuan, Central scheme hrang hrangah sum hmuh kawngah harsatna a awm vek tih sawiin, "MSACS-in MLA fund an sawi chhuak thei hi an fakawm," a ti.

HIV/AIDS dona kawngah kohhrante an harh thar a, a taka hma latu NGO-te hnenah
ṭanpuina pawh an pe nasa tawh hle tih a sawi rualin, "A invenna lamah pawh kohhrante hi ṭhangharh se, syringe leh condom mamawh ang tâwk kan neih theihna turin ṭan min lakpui se kan duh hle a ni," a ti bawk.