Martarte Lungphun kan dinah hian Politics a awm miah lo: Lal Thanhawla

Congress party ṭhalaite chuan, nimin khan kum 1997-a CTI, Sesawnga Martarte Lungphun an din kum 19-na an hmang a, Congress party president Lal Thanhawla, chief minister-in a hmanpui. Lal Thanhawla chuan, "Kum 1997-a Martarte Lungphun kan dinah hian politics a awm miah lo a ni," a ti.

MPCC president Lal Thanhawla chuan, politics khelh nana martarte hman a ni fo chu ṭha lo a tih thu sawiin, "Politics hian mihring min nghawng vek a, politics aṭanga ram rawng kan bâwl dawn a nih chuan fím taka kan ngaihtuah a ngai a, mahni inhai vûrna a ni lo," a ti a; politics-in mi a khawih kim vek thu a sawi.

February 28, 1966 aṭanga Mizoram buai chu politics buaina a nih thu sawiin Hawla chuan, "Sipai leh silai hmanga buaina a ni a, tharuma senghawi chi a ni lo a, inbiakna hmanga senghawi chi a ni," a ti.

Remna kawng zawh a hautak thu sawiin, "Sai chal rawn hawn lo mah se, sazuk sakhi an lo hawn chuan kawtchhuahah kan lo hmuak ang kan ti a ni. Remna kan neih theih nan tuma'n min hrilh lo a, a hrilhtu chu thlarau thianghlim a ni," a ti.

Martar Thlanlung din chung-chang-ah MPCC President chuan, "MNF-te an rawn chhuah aṭanga kum 11 zet chhungin martarte hriatrengna lung a awm lo a, kan ram tana maichâma an thisen hlu tak dahkhamtute tan Congress ṭhalaiin politics tel loin hei hi an din a ni," a ti a; politics hmanruaa hmanga tlawhtu an lo awm chu pawi a tih thu a sawi.

Lal Thanhawla chuan, Congress party-in hnam sipaite an diriam a la hre ngai lo tih sawiin, "Hnam sipaite kha tuna an party political leadership nen kan dah hrang daih a ni. MNF tih hian political leadership an ni a, hnam sipai chu an hran a ni," a ti.

MPYCC din Martarte Lung-phunah hi June 27, 1997-a din a ni a, hming 1,168 an ziak tawh. Nimina hun an hmanah hian martarte hriatreng nan pangpar an dah a ni.