KHAWTHLIR

Minister-in Rescue Centre tlawh

Social Welfare minister PC Lalthanliana chuan, nimin khan Kawmzawla ruihhlo ngaite enkawlna hmun Rescue Centre a tlawh a, an dinhmun a enfiah. Social Welfare Minister hian centre ṭanpuina atan Rs 1,00,000, ar vulhna atan Rs. 1,00,000 leh green house sakna atan Rs 1,50,000 a pe. Rescue Centre hi Sinner’s Friend enkawl niin tun dinhmunah thawktu pasarihte'n mi 36 an enkawl a ni.

Calendar thlalak

IPR department chuan thuchhuah siamin, Mizoram Calendar 2017 atan thlalak thehluh theih a nih thu an tarlang a, "Thlalak thehluh turte hi TIFF format, 300 DPI (minimum) a ni tur a ni a, minimum size 12” X 18,” edit loh a ni tur a ni," an ti. Thlalak hi IPR directorate-ah July 31, 2016 thleng thehluh theih a ni.

IPRO-MJA inkâwm

Champhai IPRO Neng Thianlala chuan nimin khan an district-a MJA member-te a pisaah a kâwm a, ram leh mipui rawngbawlna kawnga thuthar thehdarhtute thawhpuiah a sâwm. Thawhhona ṭha zawk an neih theih dan turte an sawiho bawk.

DDO training

Ni nga chhung awh tur ‘Training on Pensioners’ Database Management System for Drawing and Disbursing Officers (DDO’s) and Pension Dealing Hand’ chu nimin khan Account & Treasuries conference hall-ah chief controller of account R Lalbiakthanga'n a hawng.

Siaha district

Cabinet meeting thutlukna angin, Saiha district tih chu Siaha district tia ziah leh sawi tawh tur a ni. General Administration department
chuan June 22, 2016 khan hriattirna (notification) a tichhuak.

Lo neitute zirtir

KVK, Champhai District chuan nimin khan Pàwlráng khuaah sawhthing chíngtute tan training an buatsaih a; sawhthing chìn dan, sawhthing tám vên dan leh a enkawl dante an zirtir.