Taekwondo & Powerlifting Hall hawng

Mizoram Taekwondo & Powerlifting Hall, Republic Vengthlanga sak thar chu nimin khan Sports & Youth Services minister Zodintluanga'n a hawng. Hall hi cheng nuai 175.5 sênga sak a ni.

Sports Minister chuan, ṭhalaite chu ram leh hnam enkawltu turte an ni tih hriain sorkarin an hmasawnna tur kawng chi hrang hrang a ngaihtuah tih a sawi a, "Ṭhalai in-fiammite an tuina zawng ngeia an kal a, an hlawhtlinna turin hmunhma ṭha leh hmanraw ṭha an mamawh tih sorkarin a hria a, chu chu a ngaih pawimawh ber pakhat a ni. Vawi leh khatah a zavaia tih theih ni lo mah se, a tahtawlin theihtawp kan chhuah zel ang," a ti.

Taksa hriselna enkawl ṭhat a pawimawh thu sawiin Zodintluanga chuan infiammite chu ei leh in thlenga fimkhur tur leh ruih-theih thil laka fihlim tura chahin, hall thar chu Zofate hmingchherna aniha kan ram leh hnam hmingṭhatna tizual zeltu ni turin duhsakna a hlan.

Thusawitu dang parliamentary secretary (SYS) Hmingdailova Khiangte chuan, Mizoram Amateur Taekwondo Association chu Mizoram leh India ram tihmingṭhatu an nih thu a sawi a; Powerlifting Association chu pawl naupang tê ni mah se, ṭhalaite tan belh tlak leh Mizoram tihmingṭhatu an nih thu a sawi bawk.

Mizoram Taekwondo & Powerlifting Hall hi School Education department-in sorkar middle school ram an sahthlakah sak a ni. A sakna turin Mizoram sorkarin kum 2013-2014 ah Special Plan Assistance (SPA)
aṭangin Rs. 175,55,000 a pe a, August 1, 2014-ah hna thawh ṭan niin, January 8, 2016-ah sak zawh a ni.

Hall hi chhawng hnih a ni a, a dung metre 28 leh a vâng metre 16.50-a zau a ni. Chhawng hnuai zawk chu Mizoram Powerlifting Hall atan hman tur a ni a, chhâwng chung zawk chu Mizoram Taekwondo Hall atana ruahman a ni.