Referral Hospital hnathawh tibuaia puhin MNF ṭhalaite lakah FIR thehluh a ni

MNF ṭhalai nia insawi mi ṭhenkhatin State Referral Hospital tihchangtlunna hna thawh mek an tibuaia ngaih a nih avangin, State Referral Hospital hotute chuan Kulikawn Police Station-ah FIR an thehlut a; nimahsela nimin tlai thleng khan police-te'n thubuai an la ziak lut lo.

Thu dawn danin, June 25, 2016 tlai dar 5 vel khan MNF ṭhalai nia insawite'n State Referral Hospital-a medical college dinna tura hna thawh mek an en a; an hnathawh a chhe lutuk nia sawiin, leirawhchante chu an paih bung a ni.

MNF ṭhalai nia insawite hi hna thawktute tibuaiah puhin State Referral Hospital hotute chuan June 25 vek zanah Kulikawn PS-ah FIR thehlut. FIR thehluhah hian Kulikawn PS chuan nimin tlai thleng khan thubuai an la ziak lut lo thung.

State Referral Hospital-a medical college (MIMER) din a nih theih nan sorkarin a tihchangtlun hna a thawk mek a; Noida-a hmunpui nei HSCC-te chu consultant-ah an hmang.

Vanglaini palai zawhna chhangin MNYF president K Vanlalvena chuan, June 25 tlaia State Referral Hospital-a kalte chu MNYF mi leh sate an ni a, mahse, headquarters aṭanga a hranpaa an tirh a ni lo tih a sawi a; "Hman ni deuha kan tlawh tawhnaa leirawhchan chhe lutuk an hmante an la hmang em tih an lo va en a, a ṭha lo an hman avangin ṭhenkhat chu an kuai bung a, hna thawh tawh sa erawh an khawih lo," a ti.

K Vanlalvena chuan, damdawi-in tih-changtlunna atana leirawhchan an hmante chu a chhe hle tih a sawi a; Referral Hospital thuneitute'n FIR an thehlut a nih chuan, a aia na zawka an la chêt tur thu a sawi bawk.