Kan sorkar chuan zu kan khap ang - MNF

MNF National Exe-cutive Committee chu nimin khan Vanapa Hall-ah an ṭhu a, MNF president Zoramthanga’n a kaihruai. Resolution pass in, MNF a sorkar hunah zu zawrh phalna dan MPLC Act chu ṭhiah a, zu zawrh khap leh an rêl thu an puang.

MNF resolution chuan, "Congress Sorkar-in zu a zawrh chungchangah MNF-in ngaihdan fel tak a neih angin, sorkarna kan siam chuan mipuite hmakhaw ngaiin, MLPC Act ṭhiatin zu zawrh khap leh ni se, kan ti. Sorkar hotu sang hnenah thlen a, bawhzui ṭha kan ti a, sorkarin zu zawrh a kalpui zel dawn a nih chuan hmalak zui dan tur pawh General Headquarters hotute kutah dah nghal ṭha kan ti," an ti.

MLPC Act hi January 15, 2015-ah hman ṭan a ni a, zu zawrh ṭan hun erawh chu March 16, 2015 a ni. Hemi hma hian Mizorama zu khap burna dan MLTP Act chu February 20, 1997 aṭangin kum 17 chhung hman a ni.

MNF resolution chuan, India ram leh Mizoram sorkar enkawla thuneihna chelh rei ber chu Congress party an ni tih sawiin, rethei tamna rama thlentu an nih thu an sawi a; hmarchhak biala Congress party tihbo duhna thinlung a piang mek chu lawmawm an tih thu leh Noth East Democratic Alliance hawnna, July 13, 2016-a Guwahati-a neih tura tel an tum thu an tarlang.

Mipui ni tin mamawh a awm ṭha lo nia sawiin, MNF chuan, kudam ruak thâwm hriat tur a awm fo te, ration card siam dik theih loh te, gas tihchingpen hriat tur a awm rengte chu sorkarin a mawhphurhna a ken zawh loh vangah an ngai tih an sawi a, "Supply Minister hian mawhphurhna a hlen zo lo kan ti a, minister ni zui zel tlakah kan ngai lo," an ti.

Mizoram district pa-ngaah PRRS a lên tawh avangin chhungkaw tam tak an mangang tih sawiin, "Congress sorkar a ngáwi reng hi kan dem," an ti a; vawk chân chhungkuate zangnadawmna pe ngei turin sorkar an phût a ni.