Remna Ni lawmnaa tel turin mipui sáwm PM Narendra Modi-a'n sawmna a chháng lo
Remna Ni Celebration Organising Committee hruaitute chuan, naktuka Mizoram hmun hrang hranga Remna Ni kum 30-na lawmna turah tel vek turin Mizo mipui an sáwm. Khuallian tura an sàwm, prime minister-in Narendra Modi-a'n a theih leh theih loh tur thuah chhanna a rawn pek loh hrim hrim avangin programme siam kawngah an buai phah thu an sawi.
Remna Ni Organising Com-mittee hruaitute chuan nimin khan Aizawl Press Club-ah thuthar thehdarhtute an kâwm. An chairman Lalbiakzuala, Central YMA president chuan, kum 2015-a YMA General Conference thurel angin, Remna Ni chu Mizo mipuite'n pawl/party bik sawi loa an lawm tlân theihna turin an bawhzui a, chief minister Lal Thanhawla leh sorkar hotute an dawr hnuah, Mizoram hmun hrang hranga hmang tur leh Aizawlah chuan Lammuala hman turin an ruahman tih a sawi.
Lalbiakzuala chuan, Remna Ni pearl jubilee chu tlawmngai pawl leh political party hrang hrang leh pawl dangte ruahman angin Mizoram hmun 36-ah hman a ni dawn tih a sawi a, "Hun lo kal zel turah Remna Ni kan hman hian remna leh muanna hlutzia
ṭhangtharte leh Mizo mipuiteah a tuh ngei kan beisei," a ti.
Zawhna chhangin Lalbiak-zuala chuan, kum lo kal zel turah Remna Ni chu YMA huaihawtin hman zel a nih dawn leh dawn loh sawi theih a ni lo tih a sawi.
Organising Committee secre-tary Lalhmachhuana sawi danin, Remna Ni-ah hian zing dar 8-ah YMA branch tinah 'Ro min relsak ang che' tih hla information mike neite'n an zaitir ang.
Tuna hriat chinah Aizawl bakah, YMA sub-headquarters, group leh branch-te'n hmun 38-ah an lawm dawn a ni.
Lawngtlai district-ah chuan CYLA leh Siaha district-ah chuan MTP kaihhruaia hman tura tih a ni. Hetih lai hian, Lawngtlaiah chuan hmalakna a awm vak rih lo niin an sawi.
A lawmna hi chawhma dar 10:30-ah ṭan tur a ni a; a lawm-na pui ber, Lammualah chuan Governor khuallian a ni ang a, Chief Minister khualzahawm a ni ang.
Khuallian leh khual-zahawm bakah, political party hrang hrang president-te leh pawl aiawhte'n thu an sawi dawn a; CYMA Cultural Troupe leh YMA branch 79-te'n Cheraw an kan dawn. Chawhnu lamah rimawi kûtpui ang deuhin, mimal, zaipawl leh band hrang hrangte an zai ang.
Lammuala lawmnaah hian MNF-te rammut laia rammu zawng zawngte tan ṭhutna bik an siam dawn a ni.
Organising Committee chairman Lalbiakzuala chuan, Remna Ni lawmnaa khuallian turin PM Narendra Modi an sâwm a, May 19, 2016-ah sawmna an thawn a; chief minister Lal Thanhawla'n ṭawngkaa a sawm bakah, MNF President leh Mizoram BJP-te'n ziakin ngenna an thawn ve bawk tih a sawi.
Khuallian tura sàwmna chu Narendra Modi chuan a rawn chhang lo hrim hrim tih sawiin, Lalbiakzuala chuan, "A theih tur emaw, theih loh tur thu emaw, chhanna kan dawng lo hrim hrim hi Mizote hi min va ralkhat en em tihte pawh zawhna a awm thei a ni. Chhanna min pek loh vangin programme siamah pawh kan buai phah hle a ni," a ti.
Remna Ni lawmna atan hian Mizoram sorkar chuan Aizawl district tan Rs. 5,00,000 leh district dang zawng tan Rs. 3,00,000 ṭheuh, a vaiin Rs. Rs. 26,00,000 a tum dawn a ni.
Aizawla Remna Ni
Lawm nana sum thawhte
# Thawhtu Thawt zat
1. MUP Rs. 10,000
2. MHIP Rs. 10,000
3. ZDU Rs. 10,000
4. MJA Rs. 10,000
5. Central YMA Rs. 50,000
6. MKHC Rs. 20,000
7. Congress party Rs. 1,00,000
8. MNF Rs. 50,000
9. MZP Rs. 10,000
10. MSU Rs. 10,000
11. Sorkar Rs. 5,00,000
Total Rs. 7,80,000