Mit donate turin mi 4,137 an inpe tawh

Mit enkawlna kawnga thawktu, opthalmic assistant-te tan nimin khan IPR Conference Hall-ah training neih a ni a, Health Services director Dr Rohmingthanga Ralte-in a hmanpui. He hunah hian Mizoramah mitdel mi 1,253 leh mit pe (donate) tura inziak lut tawh mi 4,137 an awm thu an tarlang.

Training hi National Programme for Control of Blindness (NPCB) state programme officer Dr Lalremmawii'n a kaihruai a; khuallian Dr Rohmingthanga Ralte chuan, mit enkawlna kawnga thawktute chu an pawimawhzia hre chiang turin a chah a, mahni hnaa inring tâwk tur te, in chhiar zau zel tur leh mahni hnaa tuina tak tak nei turin a fuih.

Dr Lalremmawii'n a tarlan danin, India ramah kum 1976-ah blindness programme ṭan a ni a, Mizoramah chuan kum 1982-83 ah programme kalpui ṭan a ni. World Health Organisation chhinchhiah danin, khawvelah mitdel mi nuai 450 vel an awm a; India ram bikah mitdel mi nuai 190 vel awmin, chu chu India ram mihring zat
aṭangin 9% a ni.

Survey hnuhnung bera a lan danin, Mizoramah mitdel mi 1,253 an awm mek a, chu chu Mizoram mihring zat aṭangin 0.78% a ni. June 20, 2016 thleng khan mit donate tura inziak lut tawh mi 4,137 an awm a, mit thlak (eye transplant) tura inziak lut tawh mi 273 an awm. Mit thlak hmasak ber chu September 25, 2009-ah tih a ni a; corneal transplant thlaksak tawh mi 283 a awm. A taka mit donate tawh mi 242 an awm tawh bawk.

Nimina training-ah hian Aizawl Civil Hospital-a eye specialist Dr Enghmingliani leh Dr Lalbiak-tluangi ten mit chungchanga thil pawimawhte an sawi a; vawiinah chhunzawm a ni ang.