KHAWTHLIR

TV analog

titawp dawn

Cable TV Digitization chungchanga Aizawl district nodal officer, Addl. DC Lalhmunsanga Hnamte hoa nimina ṭhukhawm chuan, July 31, 2016-ah analog signal titawpa digital signal chauh pek chhuah turin an rel. Hei hian digitization phase-III huam chin - Aizawl, Lengpui, Sairang, Darlawn leh Saitual-te a huam ang.

ILP enfiah

MPC leh ZNP ṭhalaite chuan, nimin khan Ai-zawla hnam dangte zingah Inner Line Permit an enfiah a, ILP nei lo leh felfai lo hnam dang eng nge maw zat manin, police kutah an hlân. Party pahnih ṭhalaite chuan, dan bawhchhiatna thleng reng chu ṭha lo an tih thu sawiin, "Dan leh thupek kenkawh kawnga chak leh zuala hma la turin sorkar kan phût," an ti.

CYLA-in zu man

Central Young Lai Association hnuaia Kumpuan duty-te chuan, June 27, 2016 khan Saiha taxi hmanga Bualpui NG-a pek tur sapzu ûm 90 leh rakzu litre 40 an man. Zu neitu leh a phurhsaktu taxi driver-te chu Rs. 3,000 ve ve an chawitir a, zu tawlh ru tawh lo turin ziakin an intiamtir bawk.

Paulians Day

St.Paul's HSS-a lut tawhte inzawmkhawm, Paulians Alumni chuan vawiin hian St Paul's HSS-ah Paulian's Day an hmang dawn. Kumina Paulians Day hi HSLC 1991 batch-te puala hman tur a ni.

CYMA directory

Central YMA Telephone Directory 2016 chu nimin khan Central YMA Hall-ah CYMA president Lalbiakzuala'n a tlangzarh. Directory hi Rs. 100 man a ni a, a duh apiang tan lei theih a ni.

Lusûn khawhar

Lai Autonomous District Council (LADC)-a CEM political adviser Hmunhre (84), Lawngtlai Council Veng chu nimin zing dar 9:40 khan cancer vangin Lunglei Civil Hospital-ah a thi a, vawiinah an inah vui a ni ang. Hmunhre hi kum 2010 khan LADC MDC atan thlan tlin a ni a, LADC Planning Board vice chairman hlui a ni.