Gas sem dan leh tuialhthei sawiho

Nimin khan Food, Civil Supplies & Consumer Affairs (FCSCA) secretary Dr Franklin Laltinkhuma kaihhruaiin, Mizoram Legislative Assembly Secretariat conference hall-ah Mizorama eirawngbawlna gas leh tuialhthei sem dan leh a kaihhnawih hrang hrangte sawiho a ni.

Meeting-ah hian sorkar department hrang hrang hotute leh Aizawl City Local Council Association, Central YMA, Mizo-ram Consumer Union (MCU) leh Gas Distributor Association hruaitute an tel.

Mizoram hmun hrang hranga gas khawih chingpen awm ṭhin ven kawnga hmalak dan tur te, gas consumer-te cash subsidy dawng ṭha lo eng emaw zat la awmte'n mumal zawk an dawn theih dan tur te, khua/veng tinah rualkhai taka gas sem a nih theih dan turte sawiho a ni.

Petrol leh diesel chungchangah, black market-a hralh, pawlh dal leh khawih chingpen ṭhin chungchang sawiho a ni a; khuahkhirhtute lamah thawktu indaih lohna awm mah se, awmze nei zawk tura hmalak theih dan tur an sawiho.

Meeting-a tarlan danin, Marketing Discipline Guidelines 2014 for LPG Dis-tributors-a a lan dan chuan, gas bûr phurh chu bottling plant aṭanga distributor-te kudam inkar zawng chu transporter-te mawhphurhna a ni.

Distributor-te'n transporter-te hnen aṭanga an dawn fel hmain a bûk tlin leh tlin loh leh a him dam dan an enfiah tur a ni a; dan ang chuan 10% tal an check tur a ni.

Meeting resolution

1. Khua/veng tina gas distribution point-ah gas cylinder bûk vek a ni ang. Bûk tling lo chu distributor-te'n an la let leh ang a, company-ah an thawn lêt tur a ni. An thawn letna lehkha copy FCSCA department-ah an pe ang a, bûk tling lo chu customer-te hnenah sem theih a ni lo ang.

2. Gas distributor-te'n transporter-te hnen aṭanga gas an dawnin uluk takin an bûk ang a; distribution point-a bûk tling lo hi distributor-te mawh a nih avangin uluk takin gas bûrte bûk se.

3. Danin a phût anga India ram hmun danga an tih dan angin, advance booking, etc. hi Pilot Project angin veng pakhatah enchhin ni se.