Mizoram BJP-in MKHC an thláwp

BJP Mizoram Pradesh chuan thuchhuah siamin, Yoga chungchanga Mizoram Kohhran Hruaitute Committee (MKHC) thuchhuah chu an thlawp tlat thu an tarlang.

Mizoram BJP chuan, BJP-in thupui pakhata an neih chu India Constitution secular principle kenkawh a ni tih sawiin, Mizo missionary-te leh Kristiante chunga sakhuana thil vanga tawrhna a thlen hunah anmahni ṭanpui tura chak taka thawh an tum thu an sawi a, "Keimahni ram ngeia kan Kristianna atana hlauhawm a lo thlen pawha kohhran hruaitute puihbawm hi kan tum. Yoga chungchanga MKHC thuchhuah kha kan thlawp tlat a ni," an ti.

Prime minister Narendra Modi-a'n UNO aṭanga Yoga a tihlar chu taksa hriselna atana insawizawi a ni tih sawiin, Mizoram BJP chuan, sakhuana khawih theih ‘Om’ tih chham leh lei leh van thlarau nena inpumkhatna tih lam a tel lo niin an sawi a; Yoga-ah hlauh tur a awm loh thu leh rinna tibuai thei thil chu Central sorkar pawhin a tih luihtir thian loh thu an sawi.

Mizoram BJP chuan, "Yoga zîk-tluakah chuan meditation a tel lo thei lo. Chuvangin, hriselna atan tih a nih pawhin meditation tel loin kan tih a ngai. Hemi chungchangah hian dan tlawhchhan tur ṭha tak kan nei," an ti. Constitution (Fifty-Third Amendment) Act, 1986, Article 371G-ah chuan, ‘Mizote sakhua leh khawtlang thil tih ṭhin (Religious and Social practices) chungchanga Parliament dan siam reng reng Mizoram Legislature Assembly-in a pawm ve phawt loh chuan hman theih a ni lo ang’ tih a nih thu an sawi a ni.