SMTC-a CCA zir zote certificate hlân

Labour, Employment & Industrial Training minister Lalrinmawia Ralte chuan, nimin khan Synod Multipurpose Training Centre, Mission Vengthlangah Certificate in Computer Application Course batch 17-naa zir zote thlahna inkhawm a hmanpui a; zir zote hnenah certificate a hlân.

Zirlaite thlahna inkhawm hi SMTC programme director Rev. Vansawma'n a kaihruai a; Lalrinmawia Ralte chuan, Mizoram sorkarin skill development a ngai pawimawh tih sawiin, "Ṭhalai sang chuang zet training pek an nih hnuah phai lamah hnate an thawk mek a ni," a ti.

LEIT Minister chuan, zirlaite'n thiamna tak tak, rawih tlak thiamna an neih chuan hnain a zawng ṭhin tih a sawi a, CCA zir zote chu an thil zirah an rilru pe tlat tura a fuih bakah, ram pawna an kal dawn a nih chuan an thawhna tur zir chiang hmasa turin a chah.

SMTC hi January 1996-ah ṭan a ni a, puanṭhui, pheikhawk chhe siam leh CCA zirna a awm mek. Tunah hian zirlai 86 an awm a ni a; nimina CCA zir zo an thlah takte hi mi 18 an ni.