Khaw tina internet chak ṭha pek dan tur sawiho

Higher & Technical Education (HTE) minister R Romawia, Finance minister Lalsawta, Information & Communication Tech­nology (ICT) minister Lal Thanzara, parliamentary secretary TT Zothansanga leh sorkar mi pawimawh dangte nimina CMO con­ference hall-a ṭhukhawm chuan, Mizoram khaw tinte internet chak leh man tlâwm zawka thlunzawm dan tur an sawiho.

Meeting kaihruaitu, ICT minister Lal Thanzara chuan, Andhra Pradesh-in hlawhtling taka an kalpui Andhra Pradesh Fibre Grid zûlzuia Mizorama internet inthlun zawmna neih dan zawn a nih thu a sawi a, "Bharat Net-II project chu Mizoram sorkarin kalpui a remtih avangin sorkar laipui ṭanpuina leh Andhra Pradesh State Fibernet Limited (APFSL)-te nen thawkhoa project hlawhtling tak kalpui theih beisei a ni," a ti.

Meeting-a tarlan danin, Andhra Pradesh Fibre Grid kalpui dan chu May 2016 khan ICT department official-te’n Hyderabad-ah an zir chiang a; Mizoramah hman ve theih dan a awm em tih an enfiah hnuah, APSFL leh project kalpuitu Tera Software company hotute Aizawlah lo kalin, minister-te leh official dangte nen an sawiho a ni.

Meeting-ah hian APFSL managing director Sam­basiva Rao leh a thawh­pui te, Tera Software vice chairman Gopichand Tummala leh a thawhpuite an tel a; Power & Electricity secretary Rajiv Kumar Gupta, ICT secretary C Lal­hmachhuana leh ICT leh P&E official-te an tel bawk.