LC leh VC inthlan buatsaih a ni LC/VC 32-ah inthlan theih a ni lo
Mizoram State Election Commission (SEC) chuan nimin khan Mizorama district pakuaah village council leh local council inthlan a buatsaih a, Covid-19 vanga inthlan theih lohna khua leh veng 32 a awm a, LC 24 leh VC pariat an ni.
SEC ruahman dan chuan, inthlanah hian zing dar 7 aṭanga tlai dar 5 thleng vote thlak tur a ni a, hmun ṭhenkhatah chuan hun bituk chhunga vote thlak zawh hman a nih loh avangin vote thlak hun pawhsei a ni.Inthlanna chhehvelah Covid-19 vanga sorkarin zawm tura a tihte mipuiin ṭha taka an zawm theih nan election official-te bakah MPF leh YMA-te an duty hlawm.
Polling station leh a chhehvel hmuh chinah, polling station chhung bikah social distancing ṭha taka zawm a ni a, polling booth páwn lamah erawh chuan zawm ṭhat lohna a awm nual. Hmai tuam loa vote thlak phal a ni lo a, polling booth luhnaah leh chhuahnaah vote thlak turte chu hand sanitiser hmantir vek a ni bawk.
Inthlan hi Mizoram district pakuaa VC 558 leh Aizawl khawpuia LC 83-ah buatsaih tum a ni a, mahse, Covid-19 leng vangin LC 24 leh VC pariatah inthlan buatsaih theih a nih loh avangin VC 551 leh LC 59-ah inthlan buatsaih a ni. Vote tlate chu nizan khan chhiar nghal a ni a, he thu ziah lai thleng hian result hriat theih a la ni lo.
Nimin tlaia Vanglaini palai zawhna chhangin SEC hotute chuan, harsatna an hnena thlen a awm loh thu an sawi a, "Harsatna a awm a nih pawhin kan hnen thleng loa chinfel theih a ni ang. Keini lam chuan harsatna report dawn kan nei lo," an ti.
Nimin zing lam khan LC dang pathum - Mission Vengthlang, Khatla South leh Lawipu-ahte inthlanna buatsaih lo turin SEC hian a puan belh leh a ni. Hetih lai hian, SEC chuan VC 12-ah chuan chuhtu awm loin MNF candidate-te tlingah a puang a, VC pahnih dangah chuhtu awm lo bawkin Congress party candidate-te tlinga puan an ni. Reserved seat (hmeichhe seat) bikah, Tualte-ah INC candidate leh Kawlhawk leh Vangchia-ah MNF candidate-te tlinga puan a ni.