Mipui leh sorkar thawhho that a pawimawh: CM

Kolasib DC Circuit House chu nimin khan chief minister Lal Thanhawla'n a hawng a, he in hi cheng nuai 239.54 sênga sak a ni. Chief Minister chuan, hmasawnna atan mipui leh sorkar department-te thawhho ṭhat a pawimawh thu a sawi. Circuit House hawnna pual hian Kolasib Diakkawn YMA Hall-ah inkhawm buatsaih a ni.

Chief Minister chuan, ram hma-sawnna atan department leh mipuite an thawhho ṭhat a pawimawh thu sawiin, "Department-in mahni ngawtin hna an thawk thei lo a, an kut leh ke ber chu mipuite an ni. Chuvangin, sorkar hnathawk leh mipuite'n neitu rilru púa hna kan thawh a, taimakna, dikna leh rinawmna leh takna nen theitawp kan chhuah tur a ni," a ti.

Lal Thanhawla chuan, Mizote chu Pathianin a hmangaih tih sawiin, "Kan chhehvela Chanchin Ṭha hril tura a ruatte kan ni. Hetiang a nih lai hian zûk leh hmuam kan tih nasat avangin cancer natna vei tam berna state leh HIV vei tamna state kan ni," a ti a; cancer leh HIV vei tamna state nih leh ringtu nih chu thil inhmeh lo a nih thu a sawi.

NLUP chungchang sawiin CM Hawla chuan, "Sorkar hnathawk, sumdawng leh mi hausate tel lohna, mirethei chanhaite khaichhuahna tur a ni. Taima taka thawktute chu an dingchhuak ang a, NLUP an dawn pawh a nihna anga hmang lote chu a hlawhtlingte hnenah an la inhlawh dawn," a ti.

Chief Minister chuan Remna Ni chungchang sawiin, "Remna kan neih kum 30-na kan thleng hi a ropui a, tute mahina sawi nâwi theih a ni lo," a ti a; remna thlentu nih inchuhna awm chu thil ṭha a nih loh thu a sawi.

Inkhawmah hian parliamentary secretary K Lalrinthanga, bialtu MLA PC Zoram Sangliana leh Kolasib DC H Lalengmawia te pawhin thu an sawi.

Kolasib-a Circuit House hawn tak hi March 2007-ah sak ṭan niin, October 2011-ah zawh a ni a; VIP room pahnih, khual pindan 17, conference hall, choka leh dining room-te a awm a, basement chhiar telin Mizopa chhiar danah chhâwng li a ni.