Zu zawrh phalna MLPC Act hlîp turin MNF party-in Chief Minister an ngen
MNF party hotute chuan chief minister Lal Thanhawla chu zu zawrh phalna dan, Mizoram Liquor (Prohibition and Control) Act (MLPC Act) hlîp turin an ngen a; nimin khan Chief Minister Office (CMO)-ah ngenna an thehlut.
MNF-te hian June 28, 2016-a MNF National Executive meeting thurel bawh-zuiin ngenna an thehlut tih an tarlang a; ngenna lehkhaah chuan MLPC Act ṭhiat tura ngenna point paruk an ziak. CM Lal Thanhawla a zin lai a nih avangin a personal secretary Alexander V Chongthu-in MNF lehkha hi a lo dawng a ni.
MNF ngennaah hetiang hian an ziak:
1. Zu zawrh ṭul chhana sorkarin a sawi pakhat chu chhiah (revenue) tam tak lain kan hlâwk phah dawn tih a ni a. Tunah hian sorkar hian chhiah aṭangin cheng vbc. 100 vel a la tawh niin kan lo hria a. Chutih lai chuan, zu leina atan a lêt li vel, vbc. 400 zet chu Mizoram páwn vairamah Mizo mipuite pawisa a luang chhuak ve thung niin kan hria. Rs. 10 bo zawn nan Rs. 50 sêng ang kan ni. Financial chhiarkawp nuihzatthlak tak leh awmze nei hauh loa revenue lak luh tum leh sawimawina niin kan hria.
2. Mizoram sorkarin thiam taka zuar tura insawi a nih laiin a opposite chiahin a kal a. Police 1st. Bn. MAP chauhin zu zawrh phalna an neih laiin battalion headquarters tin leh Home Guard hqrs-in an zuar ta vek mai a; chu bakah public undertaking hrang hrangte zawrhtir an ni. Chuta thawk kohhran rawngbawltute'n hrehawm tiin an bànsan a ngai ta hial a. Kohhran leh mi dang hriatah pawh zahthlak leh hrehawm khawpin zawrh a ni ta.
3. MLPC Act hnuaia zu zawrh a nih chuan zu chhia in tur a váng ang a, zu ṭha hlir an in tawh ang a, drug leh a kaihhnawih thilte a tlemin ruihhlo ngáite pawh an kiam ang tih kha zawrh chhan pakhata sawi a ni. Amaherawhchu, local zu a tam dan a ngai reng a, kan zu zawrh quality phei chu a zuartu ngeite pawhin an in duh lohte a ni. Drug phei chu a hma aiin a zalenin a tam zawk daih a, a ruih chíng ṭhalai an pung sauh thung a ni tih mi tin hriat a ni.
4. Zu kaihhnawiha thi an pung nasa ta em em. Zu zawrh aṭanga zu kaihhnawih vanga thi ringawt pawh mi sang chuang an ni tawha hriat a ni. Police-te zu kaihhnawih vanga thi pawh 200 an pêl tawha hriat a ni. An hlawh lakna headquarters-ah a man pe nghal leh a bá pawha lei nghal theih zu zémpui a awm miau avangin an thi zawih zawih mai a ni.
5. Chhungkaw nun a khawih buai nasa ta em em mai. Nupa inkara inhauna leh inṭhenna pun belh nasa em em mai te, nula leh tlangvalte zu lei phalrai vanga nun inthlahdah ta, natna ṭihbàiawm vei hlauhna boruak mi tuamtu hahthlak takte leh Mizo hnam tlemtê, pung tam tura induhthawh nâk alaia zu vanga a hun hmaa kan thi zawih zawih ta maite hi a pawiin a rapthlak tak meuh.
6. India rama Kristian ni lo state tam takin 'A chhiah pawh kan ît zo tawh lo' tia hmanhmawh taka zu zawrh an khap laia keini Kristian inti, ram danga Chanchin Ṭha hril darh tura kohhran leh mipuite inbuatsaih mup mupin zu kan zuar thar ta mai hi ngaihtuah chian chuan, îp châwih châwihna tham niin kan hria. Kan missionary-te'n 'Mizoramin zu kan zawrh meuh hi chuan keini missionary ho Chanchin Ṭha hril tur pawh kan zak a, kan va hrilna mite pawhin min lo en dan a dang hlein kan hria,' an tih pawh hi thil âwm tak a ni.