KHAWTHLIR

Department Chhûn fin

Mizoram sorkara department puitling pahnih - Industries department leh Trade & Commerce department-te chu department pakhatah chhùn fin an ni a, Commerce and Industries department tih a ni tawh ang a, Industries director ni lai chu director a ni ang. Hemi chungchangah hian GAD chuan June 27, 2016 khan hriattirna a tichhuak a ni.

Thisen pe

YMA sub-headquarters, Champhai chuan nimin khan Remna Ni pualin Champhai District Hospital-ah blood donation camp an huaihawt a, mipa 32 leh hmeichhia 15-te'n thisen unit 47 an pe. Mizoram UPC-a Chawlhhmun bial PYD chuan nakkuma an bial silver jubilee pualin Aizawl Civil Hospital tan thisen unit 42 an pe a, a petute mipa 33 leh hmeichhia pakua an ni.

Step siam tlawh

Mizoram State Women Commission (MSWC) chairperson Vanlalawmpuii Chawngthu, MLA leh Aizawl Police Station-a Women Cell-a awm police-te chuan June 2, 2016 tlai khan hmeichhe thubuai nei leh vanduina tâwkte'n Aizawl PS Women Cell an panna tur step siam thar an tlawh. Step hi Aizawl Civil Hospital cabin bulah siam a ni.

Chawimawi

Mizoram Ex-Servicemen League chuan, nimin khan an pisaah sipai huaisen lawmman 'Sena Medal' dawngtu Hav. Laldinpuia leh Mount Everest-a láwn chhuak Davida Zohmangaiha leh Lalrintluangi te chawimawina hun an buatsaih a, lawmpuina an hlân.

Thilpek hlan

Remna Ni Celebration Committee, Champhai chuan nimin khan Remna Ni pualin Champhai District Hospital leh Champhai District Jail bakah, home panga - Metakhen Home, Genesareth Gospel Home, Grace Receiver Home, TNT (MZ Home) leh Emmanuel After Care-ahte thilpek an hlan.

Remna Ni exhibition

Remna Ni Organising Committee leh Mizo Photographer Society-te chuan, Remna Ni pualin nimin khan Vanapa Hall-ah Photo Exhibition an buatsaih a, remna thuthlunga hming ziaktute zinga mi Lalkhama'n a hawng. IPR department leh Mamit MJA ṭangkawp pawhin Mamit BRC Hall-ah Remna Ni pualin Photo Exhibition an buatsaih a, Mamit DC Lalbiaksangi'n a hawng.

Current-in man hlum

Mamita Power & Electricity department-a fitter Ashok Singh (56) chu June 28, 2016 chawhnu dar 3:20 khan electric current-in a man hlum. Ashoka hian Mamit Luangpawlah welding machine hmanga motor body welding a tum laiin current leak-in a man a ni.

Khawruhlianin Aizawl district duh

Khawruhlian V/C, tlawmngai pawl leh political party hrang hrangte chuan resolution an pass a; Mizoramah district thar a piang a nih pawhin, tuna an awm mekna Aizawl district-a awm zel an duh thu an tarlang.

Saihaah zu man

Saihaa MTP hruaitute chuan nimin zing khan Saihaah sap zu Rs. 1,28,400 hû an man a, nimin vek khan Saihaa MJA member-te hmuh laiin an leih bua. Zu hi Paniangi, Saiha Tlangkawn-in Lungleia wine shop aṭanga a lei khawm, Saihaa zawrh tura a tih a ni a; vaiin Rum ûm puitling báwm 29, ûm chanve chi báwm pariat, Whiskey báwm paruk leh beer báwm 15 a ni.

Tuihâwkin la

Gopal Rai (56), New Serchhip Venglai chu nimin chhun dar 12:30 vel khan Serchhip leh Keiṭum inkara hume pipe a thenfaina lamah tuihâwkin kawng thlang ft. 100 vela thui a lên a, a hmunah a thi nghal. Thu dawn danin, Gopal Rai hi Light Quarry-a thawk a ni a, a ṭhiante nen tuihâwk luankawr an tihfainaah a chesual a ni.

Dry Day puang

Excise & Narcotics Commissioner chuan, The Mizoram Liquor (Prohibition and Control) Act, 2014 (Section 11)-in thuneihna a pek angin vawiin hi Remna Ni a nih avangin zu hralh leh in phal loh ni, Dry Day a nih thu a puang a; mipuite chu dan bawhchhiaa zu hralh, lei leh in lo turin a hriattir.