Inthlan lohna LC 24 zinga 22 chu ZPM MLA bial a ni - ZPM Vice President

ZPM vice president Lalthansanga chuan, Aizawl khawpuia nimina local council inthlan neih lohna tura tih 24 zinga 22 chu ZPM MLA-te bial chhunga mi a nih thu a sawi. ZPM secretary general K Sapdanga chuan, inthlana vote thlaktu zawng zawng chungah ZPM-in lawmthu an sawi tih a sawi bawk.

ZPM hruaitu pahnihte hian nimin khan thuthar thehdarhtute an kâwm a; Lalthansanga chuan, inpeih lo tak chunga VC leh LC inthlan kaltlangpui a nih chhan chu, rorel lai MNF party-in September 1, 2020-a ṭan tur Assembly session-ah sorkar chêt fuh lohna hâi lan a nih hmaa inthlan an duh vang a nih thu a sawi.

ZPM Vice President chuan, August 27, 2020-a inthlan chu Covid-19 darh mek vangin ZPM-in a hun lo an tih thu, August 8-ah ZPM President-in press conference-ah a sawi tawh thu a sawi a, "BJP leh Congress party pawhin inthlan hun sawn hlat rawtna an thehlut. ZPM party chu kan dinna ngaiah kan la ding reng. Chuti chungin inthlan kaltlangpui luih a ni," a ti. 

Inpeih lo chunga inthlan kaltlangpui luih a nih chhan sawiin Lalthansanga chuan, "September 1, 2020-ah Assembly session a awm dawn a, sorkar chêt fuh lohna tam tak hai lan a ni dawna an hriat avangin, hemi hma ngeia inthlan buatsaih ngei turin sorkar a inbuatsaih chûk chûk niin kan hria," a ti a; AMC area-a inthlan lohna veng 24 zinga 22 chu ZPM MLA-te biala mi a nih thu leh pahnih erawh chu MNF MLA biala mi a nih thu a sawi.

ZPM secretary general K Sapdanga chuan, inthlang turin electoral roll pawh SEC-in a la peih lo nasa hle tih sawiin, "Electoral roll hi July 28, 2020-ah tihchhuah a ni a, chumi hnuah nasa taka khawih danglam a ni. August 26, campaign hun tawp níah electoral roll an khawih danglam chu a copy political party-te min pe thei chauh. Election official-te kawl leh party-te min pekah serial number inang lo a tam hle," a ti.

K Sapdanga chuan, "He inthlanna hi ZPM chuan kan lo sawi lâwk angin, Mizoram in­thlanna awm tawh zawng zawnga danglam ber leh hriat reng tur a ni dawn a ni," a ti a; vote thlaktu zawng zawngte chungah ZPM-in lawmthu an sawi tih a sawi bawk.