Local Council leh Village Council inthlang lo veng/khua -te duh dan a inang lo

State Election Commission (SEC) chuan Covid-19 léng leh a kaihhnawih thilte avangin Mizorama village council pariat leh local council 24-te chu nimina inthlang ve lo turin thutlukna a siam. Inthlang lo tura tih local council zingah ngaihdan a inang vek lo a; inthlang rih lo tura ngenna thlen an awm laiin, rawtna leh ngenna thlen lo leh inthlan duh zawkte an awm.

SEC chuan, August 25, Thawhlehni khan containment zone huam chhunga khua leh vengte chu August 27-a inthlang ve rih lo turin thutlukna a siam a, tlaiah hriattirna a tichhuak a; village council pasarih leh local council pahnih an ni.

Inthlan hma ní, August 26 tlai lamah SEC chuan inthlang lo turin LC 18 leh VC pakhat a tih belh a, zanah LC pakhat dang a tih belh leh. Nimin zingah khan local council dang pathum - Khatla South, Lawipu leh Mission Vengthlangte chu inthlan rih lo tura hriattirna a tichhuak leh bawk.

Hriat theih chinah, SEC-in August 27-a inthlang lo tura a tihte zingah hian Bungkawn, College Veng, Mission Veng, Mission Vengthlang leh Republic Vengthlangte chuan inthlan buaipuitu sorkar official-te hnenah inthlang rih lo tura ngenna an thlen. Chutih rualin, inthlang rih lo tura rawtna leh ngenna thlen lo leh an inthlan ve rih loh tur chhan hre chiang lo an awm nual bawk nia thu dawn a ni.

Bawngkawn LTF chuan August 26, Nilaini khan thuchhuah siamin, LC inthlan loh tur chungchangah zawhna a tam avangin sawifiahna an tichhuak a; Aizawl DC aṭangin zawhna chi thum an dawn thu leh an chhan dante an tarlang. Bawngkawn LTF tarlan danin, DC aṭanga zawhna an dawn - Covid-19 positive engzat nge in neih, tih chu 'Nei lo' tih a ni a; home quarantine neih zat chu mi 105 niin, chu'ng zinga mi 12 swab test result chhuakte a negative vek a, zawhna an zawh laiin test result nghak lai paruk an la nei. Nilaini tlai khan mi 29-te swab sample lak leh a ni bawk. Inthlan kaihhnawih thil zawh an ni lo.

Home quarantine mekte'n vote an thlak theih dawn leh dawn loh chung­chang CMO (chief medical officer) hnenah an zawh thu tarlangin Bawngkawn LTF chuan, vote an thlâk thei loh tur thua chhàn an nih thu an tarlang a, "Vawiin (Nilaini) niléng hian Bawngkawn LTF-te chuan inthlanna tura pawimawh leh kan chêt velna tur buaipui a ni a, hemi atan hian Rs. 10,000 chuang sên a ni... Inthlan ṭhulh a ni tih kan hriat hian kan hrilhhai hle," an ti.

Inthlang ve rih lo tura tih an nih chungchang chu an bawhzui tih sawiiin, returning officer PC David Lalrinliana chu a pisaah Bawngkawn MPF hruaitute nen an hmuh nghal thu an sawi a, "RO pawh hian information a dawn loh thu leh inthlanna tur an la buaipui mek zel thuin min chháng a ni," an ti a; LC inthlan chungchanga an ngaihdan sawi khâwm turin August 27 (nimin)-ah an ṭhutkhawm tur thu an tarlang bawk.

Durtlang LTF secretary K Lalbiakthanga chuan zawhna chhangin, LC thlang rih lo tura rawtna leh ngenna LTF-in an thlen loh thu a sawi a, "A chhan eng nge ni ang aw, kan lo ti ve zawk a ni," a ti.

K Lalbiakthanga chuan, DC office aṭangin August 25 zanah an LTF Chairman an bia a, an dil angin quarantine an neihte list an thawn tih a sawi a, "Min rawn zawh chhan hi quarantine mekte'n vote an thlak ve theih dan tur lam zawkah kan lo ngai a. Vawiin (August 26) chhun­ah min rawn zâwt leh a, ruahmanna kan siam dan min rawn zawt. Ruahmanna kan la siam hran loh thu leh RO-te nen la sawiho kan tum thuin kan lo chhang a ni," a ti a; chumi hnu lawkah inthlang lo tura tih an nih thu an hre zui tih a sawi.

Durtlang LTF Secretary sawi danin, Covid-19 positive an neih chu hmeichhia, quarantine centre-a a awm laia hmuh chhuah a ni a, quarantine centre aṭang­in ZMC-ah lak nghal niin, chu chu thla hnih dáwn a ni tawh. Home quarantine an neihte swab test result August 26-ah a chhuak a, an negative vek a; Bûkpui pain an veng dawra thil a leina pawh an negative tih finfiah tawh niin, dawr pawh an hawntir leh tawh. Zangena petrol pump-a kal mi 130 vel an nei a, sorkar thuchhuak angin August 10-15 inkara pawisa inkìr ngeite an thliar leh a, chu'ng mite hming chu sorkarah an la thehlut lo thung.

Inthlang lo tura tih zinga mi Maubawk LTF lam chuan inthlan an duh a, an duh thu pawh sorkar thuneitute hnenah an hrilh nia thu dawn a ni. Vanglaini palai zawhna chhángin Maubawk LTF chairman (YMA president) Lalrindika chuan, "Inthlan kan duh e, kan ti a; mahse, sorkar hian quarantine lai neite chu inthlantir loh an duh a niin kan hria," a ti.

Maubawk LTF Chairman chuan, Covid-19 leh quarantine chungchangah sorkar official-te aṭangin zawhna an dawn ve thu leh quarantine mek mi 30 an neih thu a sawi a, "Inthlan chungchang pawh min rawn zawt a, kan duh thu kan lo hrilh," a ti. Amah chu YMA President a nih angin sorkar official aṭang pawha an biak ber a ni tih sawiin, "Keimaha thu tihtluk ngawt a rem lo a, kan hotu dangte ka ráwn a, political party lamte pawh kan ráwn a ni," a ti a; political party-te erawh chu an duh dan a inan vek loh thu a sawi. Maubawk aṭanga thu dawn danin, an vengin inthlan an duh chungchangah Sector Magistrate-in LTF hnenah, 'A tlai tawh, dilna lo ziak rawh u,' a ti a; dilna chu an ziak a, mahse, an pawmsak ta chuang lo a ni.

Khatla LTF chuan LC thlan sawn chungchang sawifiahna tichhuakin, "Khatla LC thlan sawn chhan hi Covid-19 léng vanga home quarantine lai chhung­kua 49 an awm a, hetah hian voter 147 lai an nih vang a ni. Duh rêng vang ni lo a, hri léng vanga vote thlâk thei lo tur an awm tâk avanga sorkarin ruahmanna a siam a ni tih kan hriat a ṭha àwm e," an ti.

Khatla LTF chuan, contact tracing chhunzawm ngai a awm thu leh home quarantine tur mi eng emaw zat an awm belh thu an tarlang bawk. August 26, Nilaini tlaia Vanglaini palaiin Khatla LTF office bearer-te a biaknaah, SEC-in inthlang rih lo tura an veng a tih chhan an hriat loh thu te, inthlan rih loh rawtna leh dilna an thlen loh thu te, an vengah Covid-19 vei mek an awm rih loh thute leh contact tracing tih ngai an neih rih loh thute an lo sawi tawh a ni.

Ramhlun North LTF pawhin LC inthlan neih rih loh tura tih an nih chung­chang an sawifiah a; August 25, 2020 zanah Aizawl DC lam aṭangin zawhna chi thum - home quarantine neih mek zat, home quarantine mek zinga vote nei zat leh home quarantine mek zinga sample test ngai zatte an dawn thu tarlangin, "Kan dinhmun dik tak hi Aizawl DC-ah pek a ni a, inthlan kaltlangpui kan duh leh duh loh pawh zawh kan ni," an ti.

Ramhlun North LTF chuan, inthlan kaltlangpui theih lohna tur chhan point lian tak an nei lo tih sawiin, "Hmalakna apiangah sorkar kan thawhpui thei e, tia chhanna siam a ni," an ti a; home quarantine mek eng emaw zat an neih avang leh vote tla a tlem dáwna a lan avangin an veng chu inthlang rih lo turin thutlukna an siam ta a nih a rinawm thu an tarlang.

Republic Vengthlang chuan Aizawl South-I Incident Commander hnenah an dinhmun an thlen a; chhungkaw ṭhahnem tak inkharkhiptír an nih thu leh inkhàrkhip chhungkaw zingah hian LC candidate pali an awm thu te, contact tracing an tih mek zel thute sawiin, LC thlang thei dinhmuna an din loh thu an thlen a, an veng chu lockdown puan a nih theih nan hma laksak turin an ngen nghal.