Zoram pumah Remna Ni lawm a ni Larsapin Mizo mipuite duhsakna a hlân

Remna Ni champha vawi 30-na chu nimin khan Mizoram hmun hrang hrangah lawm a ni. Aizawlah chuan Lammualah lawm a ni a, Governor Lt.Gen. Nirbhay Sharma khuallian niin, chief minister Lal Thanhawla khualzahawm a ni. Larsap chuan, Mizo mipuite Remna Ni chibai bûkin, hma lam hun êng tak nei zel turin duhsakna a hlân.

Governor chuan, Mizoramin nasa taka hma a sawn zel theih nan remna leh muanna nghet taka vuang chunga theihtawp chhuah mektute duhsakna hlanin, "He ni pawimawh bikah hian Mizoram tan remna leh muanna a awm theihna tura nunna hlu tak hlân zawng zawngte zahna i hlan ang u," a ti a; an thil tih ropui tak chu Mizoram awm chhungin theihnghilh a nih loh tur thu a sawi.

June 30, 1986-a Mizoram Peace Accord ziah a nih rualin buaina a reh a, Mizoram chu hlim-nain a khat tih sawiin, Larsap chuan, "He inremna ropui leh chhuanawm tak hian 'Khandaih aiin ziakfungin thil a ti thei zawk' tih a tichiang hle a ni," a ti a; inremna avangin Mizoram chu February 20, 1987-ah state dinhmun pek niin, India rama state 23-na a nih thu a sawi.

Lt.Gen. Nirbhay Sharma chuan, Mizo mipuite thinlungah MNF-in hnam tana a thi ltih ropui takte theihnghilh a nih tawh loh tur thu sawiin, "Rálthuamte an tun hnuah remna leh muanna zawnga an rawn pên chhuak kha a ropui a, an chhuanawm tak meuh a ni," a ti a; remna siamtute chu ropui a tih thu sawiin, anmahni hre reng turin Mizo mipuite a chah.

Governor chuan, Mizo mi-pui-te chu remna leh muanna hnuai-ah ràltiang ram kâi tum tura fuihin, Mizo ṭhalaite chu Mizo ṭawng chauh ni lo, ṭawng dangte thiama hmasawn tum tur leh Mizorama hmasawnna lut zel tur dawngzawng thiam tura inpuahchah turin a chah a, "Tho la, ding la, Mizoram hmasawnna atan thawktu tia chhiar tel ve turin pên chhuak rawh le," a ti.

Organising Committee chairman Lalbiakzuala, Central YMA president chuan, remna chu Mizote'n a thlawna an neih a ni lo tih sawiin, "Remna hi a man a tam a, nunna tam taka kan lei a ni a, a hlutzia i hria ang u," a ti a; Remna Ni chu politcal party leh pawl pakhat ta a ni lo a, Mizo mipuite ta a ni tih a sawi.

Lalbiakzuala chuan, Remna Ni chu a hlutna bo ṭhak khawpa inbeihna ni atan hman a nih ṭhin avangin YMA-in a huhoa hman a rél tih a sawi a, "He ni hi inremna ni atan i hmang ang u. YMA hruaitute'n remna hlutzia kan hriat avangin a bul kan tum mai chauh a ni. Hun lo kal zel turah pawh remna hlutzia inzirtir kawngah YMA a kal zel ang," a ti.

CYMA President chuan, Memorandum of Settlement anga India sorkarin a tih tur a la tih lohte tihlawhtling se an duh thu leh lungawi lote thil duh hriatsak se an duh thu a sawi a; "Remna vanga hmasawnna kan neih hi a ropui tak zet. Remna hian kan hliam neihte tidam se, hmasawnna leh ṭhan nan inhmang zel ang u," a ti.

Aizawla Remna Ni lawmnaah hian minister leh MLA te, MNF-a rammute leh mi ṭhahnem tak an tel a; CYMA vice president Vanlalruata kaihhruaina hnuaiah remna leh muanna vawng nung zel tura thutiam chham a ni a, CYMA general secretary Lalhmachhuana'n report a pe.

Aizawla YMA branch 81-te'n Cheraw an kân a, political party hrang hrang president ṭheuhin thu an sawi bakah, zaipawl leh mimal ṭhenkhat an zai. Chawhnu lamah mimal, zaipawl leh band chi hrang hrang an zai bawk.

Remna Ni hi district khawpui tinah YMA sub-headquarters-te kaihhruaiin hman a ni a, Saihaah chuan MTP huaihawta hman niin, Lawngtlaiah chuan DC pisa huaihawtin hman a ni thung.

Group YMA anga hmangte chu - Hmuifangtlang, Chalfilh, Zawlbuk, Saitual, Tuisual, Zo-bawk, Ṭawipui, Vanva, Lung-sen, Tuiphai, Khawzawl, Tuiphal, Tuichangral North, Tuipuiral, Vanhnuailiana, Kawlkulh, Vanapa, Taitesena, Dampa, Langkaih, Vantawng, Tuichangral South, Ṭawitlang, Awithangpa, Tuirial Hydel, Zampuimanga, Serlui leh Sakawrhmuituai group-te an ni. Daido leh Chuhvel branch-te'n branch angin an hmang bawk.