Remna Ni-a party president-te thusawi

Congress President

MPCC president leh chief minister Lal Thanhawla chuan, politics-in mi zawng zawng a nghawng tih sawiin, Mizoram buaina pawh politics vang a nih thu a sawi a, "Politics hi chhia leh ṭha hriatna fîm tak leh Pathian ráwn chunga kalna tur a ni," a ti. Lal Thanhawla hi Remna Ni lawmnaah hian khualzahawm a ni.

Lal Thanhawla chuan, Mizoram buaina chu MNF-te independence puan vang a nih thu sawiin, "A cho chhuaktu nia mipuiin kan ngaih chu MNF-te an ni a, mahse, Mizo zawng zawng min nghawng a, ei leh bàr zawnna, khawtlang leh kohhran thlengin min nghawng a ni," a ti. Inremna a awm theih nan pawl hrang hrangin hma an la a, Peace Committee din a nih thu sawiin, "Mipuite'n ṭawngṭaina nen remna an zawng a. Inrem theihna a nih phawt chuan lalṭhutthleng leh kan in leh lote pawh kan kian ang tiin thutlukna an siam a ni," a ti bawk.

Congress party President chuan, kum 1968 vel aṭangin MNF-te'n remna palai an tirh tawh thu leh kum 1976-ah Shillong-ah inremna ziah a nih thu a sawi a, "Kum 1976-ah remna a awm a, muanna erawh a awm lo," a ti. Pathian remruatnain inremna atan ruling party-in sorkar an namthluk nia sawiin, inremna thuthlung ziah ni, June 30, 1986 zan chu Mizoram mipuite an hlim tlan ber ni a nih thu a sawi.

Chief Minister chuan, Remna Ni rualkhai taka hman a nih theih nana YMA-in a lawmna hun a buatsaih chu lawmawm a tih thu a sawi a, "Remna leh muanna hi a man a to a, a vawn him kawngah ṭan i la zel an u. A vawnhimna man a to a nih pawhin kan pe zel mai tur a ni," a ti.

MNF President

MNF president Zoramthanga chuan, Mizoram remna chu tlawmngai pawlte
ṭan lakna leh kohhran leh mipui zawng zawngte ṭawngṭaina rah chhuah a nih thu sawiin, "Kan ṭawngṭainate Pathianin a chhang a, remna kan nei ta a ni," a ti a; inremnaah Mizote humhalhna tur dan ṭha tak a awm a, chungte chu Indian Constitution-ah ziah luh a nih thu a sawi.

India leh MNF ten inremna thuthlung an ziah chu duhthusam a ni lo tih sawiin Zoramthanga chuan, "Inremna hi kan duhthusam a ni lo a, MNF leh Mizo mipuite duh dan tak a ni lo a, India sorkar duh dan a ni lo a; kan Pathianin a duh dana min pek a ni," a ti a; inremna hi India sorkar, MNF leh Mizoram sorkarte inremna a nih thu leh, duhthusam ni lo mahse lawm phawt tur a nih thu a sawi.

MNF President chuan, hmun hrang hranga inremna ziahte'n a daih reih loh ṭhin laiin, India leh MNF inremna ziah erawh chu a tluantling hle tih sawiin, "Kan remna hlutzia hi hre thar ila, humhim zel turin ṭawngṭaina nen i bei zel ang u," a ti.

Zoramthanga chuan, Mizoramin
ṭhen­­awm state leh ram dangah thil hlu leh ṭangkai thawn chhuah tur a la nei zel dawn tih sawiin, "Chu'ng zawng zawng zinga a hlu ber chu kan remna neih ang hi a ni," a ti a; remna hlutzia hria a, mi dangte tan malsawmna ni turin theihtawp chhuah zel turin mipuite a sáwm.

MPC President

MPC president Lalhmangaiha Sailo chuan, Mizoram buai laiin harsatna tinrengin a thleng a, kum 13 chhung curfew puan a nih thu sawiin, "Zoram mipuite
ṭawngṭaina Pathianin a chhang a, kum 1986-ah inremna kan nei ta a, Mizoram chu state rálmuang ber kan lo ni ta a ni," a ti.

Lalhmangaiha Sailo chuan, rambuai laiin India sipaite'n Mizote nasa takuin an tiduhdah tih sawiin, India sipaite chêt dan chu Brig,. T Sailo-in Human Rights Committee a din hmangin sorkar laipuiah a thlen a, High Court-ah a khing bawk tih a sawi.

MPC President chuan, inremna ziah a nih hnuah Mizoram chu kum 30 chhung a kal tawh tih sawiin, "Kum 30 chhung hi hma kan sâwnpui em tih mipuite'n kan inzawh a ngai a, Zoram hian kan vul chhuahpui em tih kan ngaihtuah a ngai a ni," a ti.

ZNP President

ZNP president Lalduhoma chuan, India leh MNF inremna thuthlung chung­changah thu inchuh leh inpuhmawhnate a awm ṭhin thu sawiin, chutiangte chu
ṭhangtharte'n an hriat zel loh nana YMA-in hma a la chu lawmawm a tih thu sawi a, "Remna hi Pathian hnathawh a ni. Inremna hi kan duhthusam ni lo mah se, thil ṭha tam tak a keng tel," a ti.

Lalduhoma chuan, Memorandum of Settlement chu hnam tênau (minority)-te humhalhna atan hman theih a nih thu sawiin, "Inremna avangin Indian Constitution-ah Mizoram hi special category state a ni a, India rama special category state titawp mah se, special category state nih hi kan chanvo a ni a, min dâwmkân hi Central mawhphurhna a ni," a ti a; MoS-a inziak angin Central-in tih tur tam tak a neih thu a sawi.

ZNP President chuan, MoS avanga Central-in a tih tur a la tih lohte leh lungawi lo la awmte lungawi lohnate chu Mizoram sorkarin bawhzui se a duh thu a sawi a, "Inremna ringawtah lungawi mai loin, a piah lam ngaihtuah a ngai. Zofate rorelna pakhat hnuaiah kan la awm ngei kan beisei," a ti.

Lalduhoma chuan, buaina siam a harsat loh laiin buaina chinfel erawh a harsa hle tih sawiin, "Mizoram politics-ah Pathian ram lo thleng rawh se," a ti a; Mizoramah remna a awm zel theih nan ṭan la turin mi tin a sawm a ni.

BJP President

BJP, Mizoram Pradesh president Prof. JV Hluna chuan, inremna a awm theih nana hma latu leh tha thawhtute zawng zawng chungah a lawm thu sawiin, "Nangni avangin remna kan nei a ni. 'Ngaidam la, theihnghilh rawh' tih kan vawn nun avangin kan remna hi a tluangtling a ni," a ti. Remna chu ṭangkai taka hmang turin Mizo mipuite a sáwm.

Aizawla Remna Ni lawmna khuallian tura sawm prime minister Narendra Modi a rawn kal loh chungchangah, Prof. JV Hluna chuan, "Prime Minister hi state programme-ah chief minister sawm lohin a kal ngai lo," a ti a; hnam martarte leh an chhungte leh rammu tawhte hamṭhatna pek tur tihhlawhtlinna turin Central leh state sorkar an ṭanho a ngaih thu a sawi bawk.